Sher on Delhi

dillī meñ aaj bhiik bhī miltī nahīñ unheñ

thā kal talak dimāġh jinheñ tāj-o-taḳht kā

dilli mein aaj bhik bhi milti nahin unhen

tha kal talak dimagh jinhen taj-o-taKHt ka

dil kī bastī purānī dillī hai

jo bhī guzrā hai us ne luuTā hai

dil ki basti purani dilli hai

jo bhi guzra hai us ne luTa hai

chehre pe saare shahr ke gard-e-malāl hai

jo dil kā haal hai vahī dillī kā haal hai

chehre pe sare shahr ke gard-e-malal hai

jo dil ka haal hai wahi dilli ka haal hai

dillī kahāñ ga.iiñ tire kūchoñ kī raunaqeñ

galiyoñ se sar jhukā ke guzarne lagā huuñ maiñ

dilli kahan gain tere kuchon ki raunaqen

galiyon se sar jhuka ke guzarne laga hun main

amīr-zādoñ se dillī ke mil na tā-maqdūr

ki ham faqīr hue haiñ inhīñ kī daulat se

amir-zadon se dilli ke mil na ta-maqdur

ki hum faqir hue hain inhin ki daulat se

ai vaa.e inqalāb zamāne ke jaur se

dillī 'zafar' ke haath se pal meñ nikal ga.ī

ai wae inqalab zamane ke jaur se

dilli 'zafar' ke hath se pal mein nikal gai

in dinoñ garche dakan meñ hai baḌī qadr-e-suḳhan

kaun jaa.e 'zauq' par dillī kī galiyāñ chhoḌ kar

in dinon garche dakan mein hai baDi qadr-e-suKHan

kaun jae 'zauq' par dilli ki galiyan chhoD kar

janāb-e-'kaif' ye dillī hai 'mīr' o 'ġhālib' kī

yahāñ kisī kī taraf-dāriyāñ nahīñ chaltīñ

janab-e-'kaif' ye dilli hai 'mir' o 'ghaalib' ki

yahan kisi ki taraf-dariyan nahin chaltin

dillī chhuTī thī pahle ab lucknow bhī chhoḌeñ

do shahar the ye apne donoñ tabāh nikle

dilli chhuTi thi pahle ab lucknow bhi chhoDen

do shahar the ye apne donon tabah nikle

dillī ke na the kūche aurāq-e-musavvar the

jo shakl nazar aa.ī tasvīr nazar aa.ī

dilli ke na the kuche auraq-e-musawwar the

jo shakl nazar aai taswir nazar aai

dillī meñ apnā thā jo kuchh asbāb rah gayā

ik dil ko le ke aa.e haiñ us sarzamīñ se ham

dilli mein apna tha jo kuchh asbab rah gaya

ek dil ko le ke aae hain us sarzamin se hum

ai sabā maiñ bhī thā āshufta-saroñ meñ yaktā

pūchhnā dillī kī galiyoñ se mirā naam kabhī

ai saba main bhi tha aashufta-saron mein yakta

puchhna dilli ki galiyon se mera nam kabhi

kyuuñ matā-e-dil ke luT jaane kā koī ġham kare

shahr-e-dillī meñ to aise vāqiye hote rahe

kyun mata-e-dil ke luT jaane ka koi gham kare

shahr-e-dilli mein to aise waqiye hote rahe

tazkira dehli-e-marhūm kā ai dost na chheḌ

na sunā jā.egā ham se ye fasāna hargiz

tazkira dehli-e-marhum ka ai dost na chheD

na suna jaega hum se ye fasana hargiz

lailā ghar meñ silā.ī karne lagī

qais dillī meñ kaam karne lagā

laila ghar mein silai karne lagi

qais dilli mein kaam karne laga

dillī huī hai vīrāñ suune khañDar paḌe haiñ

vīrān haiñ mohalle sunsān ghar paḌe haiñ

dilli hui hai viran sune khanDar paDe hain

viran hain mohalle sunsan ghar paDe hain

marsiye dil ke ka.ī kah ke diye logoñ ko

shahr-e-dillī meñ hai sab paas nishānī us kī

marsiye dil ke kai kah ke diye logon ko

shahr-e-dilli mein hai sab pas nishani us ki

dil-rubā tujh sā jo dil lene meñ ayyārī kare

phir koī dillī meñ kyā dil kī ḳhabardārī kare

dil-ruba tujh sa jo dil lene mein ayyari kare

phir koi dilli mein kya dil ki KHabardari kare

arz-e-dakan meñ jaan to dillī meñ dil banī

aur shahr-e-lucknow meñ hinā ban ga.ī ġhazal

arz-e-dakan mein jaan to dilli mein dil bani

aur shahr-e-lucknow mein hina ban gai ghazal

hamīñ haiñ maujib-e-bāb-e-fasāhat hazrat-e-'shā.ir'

zamāna sīkhtā hai ham se ham vo dillī vaale haiñ

hamin hain maujib-e-bab-e-fasahat hazrat-e-'shair'

zamana sikhta hai hum se hum wo dilli wale hain

dil mirā jalva-e-āriz ne bahalne na diyā

chandni-chowk se zaḳhmī ko nikalne na diyā

dil mera jalwa-e-ariz ne bahalne na diya

chandni-chowk se zaKHmi ko nikalne na diya

dillī pe ronā aatā hai kartā huuñ jab nigāh

maiñ us kuhan ḳharābe kī ta.amīr kī taraf

dilli pe rona aata hai karta hun jab nigah

main us kuhan KHarabe ki tamir ki taraf

kuchh bhī hoñ dillī ke kūche

tujh bin mujh ko ghar kāTegā

kuchh bhi hon dilli ke kuche

tujh bin mujh ko ghar kaTega

dil-lagī ke vāste dehlī meñ hai maTiyā-mahal

kaun jaave ḳhaak uḌāne mulk-e-bīkāner ko

dil-lagi ke waste dehli mein hai maTiya-mahal

kaun jawe KHak uDane mulk-e-bikaner ko

ai muzaffar kis liye bhopal yaad aane lagā

kyā samajhte the ki dillī meñ na hogā āsmāñ

ai muzaffar kis liye bhopal yaad aane laga

kya samajhte the ki dilli mein na hoga aasman

yuuñ bhī dillī meñ log rahte haiñ

jaise dīvān-e-mīr chaak shuda

yun bhi dilli mein log rahte hain

jaise diwan-e-mir chaak shuda