Sher on Zulm

kahīñ sūraj nazar aatā nahīñ hai

hukūmat shahr meñ ab dhuñd kī hai

kahin suraj nazar aata nahin hai

hukumat shahr mein ab dhund ki hai

qahr Dhā.egī asīroñ kī taḌap

aur bhī uljheñge halqe daam ke

qahr Dhaegi asiron ki taDap

aur bhi uljhenge halqe dam ke

ham parindoñ se hunar chhīnegā kaun

jal gayā ik ghar to sau ghar ban ga.e

hum parindon se hunar chhinega kaun

jal gaya ek ghar to sau ghar ban gae

aap mazlūm ke ashkoñ se na khilvāḌ kareñ

ye vo dariyā haiñ jo shahroñ ko nigal sakte haiñ

aap mazlum ke ashkon se na khilwaD karen

ye wo dariya hain jo shahron ko nigal sakte hain

unhī pe ho kabhī nāzil azaab aag ajal

vahī nagar kabhī Thahreñ payambaroñ vaale

unhi pe ho kabhi nazil azab aag ajal

wahi nagar kabhi Thahren payambaron wale

kiyā ishq-e-majāzī ne haqīqat āshnā mujh ko

butoñ ne zulm vo Dhāyā ki yaad aaya ḳhudā mujh ko

kiya ishq-e-majazi ne haqiqat aashna mujh ko

buton ne zulm wo Dhaya ki yaad aaya KHuda mujh ko

sunī na ek bhī zālim ne aarzū dil kī

ye kis ke sāmne ham arz-e-hāl kar baiThe

suni na ek bhi zalim ne aarzu dil ki

ye kis ke samne hum arz-e-haal kar baiThe

mar jā.eñge jab ham to bahut yaad karegī

jī bhar ke satā le shab-e-hijrāñ koī din aur

mar jaenge jab hum to bahut yaad karegi

ji bhar ke sata le shab-e-hijran koi din aur

zulm se gar zab.h bhī kar do mujhe parvā nahīñ

lutf se Dartā huuñ ye merī qazā ho jā.egā

zulm se gar zabh bhi kar do mujhe parwa nahin

lutf se Darta hun ye meri qaza ho jaega

zulm sah ke bhī maiñ ne hoñT sī liye 'ġhāzī'

ek zarf un kā hai ek zarf merā hai

zulm sah ke bhi main ne honT si liye 'ghazi'

ek zarf un ka hai ek zarf mera hai

maiñ mulk-badar sabr bhī kar saktī thī lekin

ye dekhnā thā zulm kī sarhad hai kahāñ tak

main mulk-badar sabr bhi kar sakti thi lekin

ye dekhna tha zulm ki sarhad hai kahan tak

usī ko sauñp dī ham ne hifāzat apne ḳhemoñ kī

vo ādam-ḳhor jo lāshoñ kā byopārī rahā barsoñ

usi ko saunp di hum ne hifazat apne KHemon ki

wo aadam-KHor jo lashon ka byopari raha barson

guzrā thā apne shahr se rāvan fasād kā

zālim mohabbatoñ kī kathā.eñ bhī le gayā

guzra tha apne shahr se rawan fasad ka

zalim mohabbaton ki kathaen bhi le gaya

Dar aur zulm kā yaaro koī ant nahīñ

ḳhud ko DhūñD rahe haiñ log ab rāvan meñ

Dar aur zulm ka yaro koi ant nahin

KHud ko DhunD rahe hain log ab rawan mein

ḳhud-farebī meñ mubtalā rakh kar

zulm kī tum ne intihā kī hai

KHud-farebi mein mubtala rakh kar

zulm ki tum ne intiha ki hai