ظلم پر اشعار

کہیں سورج نظر آتا نہیں ہے

حکومت شہر میں اب دھند کی ہے

قہر ڈھائے گی اسیروں کی تڑپ

اور بھی الجھیں گے حلقے دام کے

ہم پرندوں سے ہنر چھینے گا کون

جل گیا اک گھر تو سو گھر بن گئے

آپ مظلوم کے اشکوں سے نہ کھلواڑ کریں

یہ وہ دریا ہیں جو شہروں کو نگل سکتے ہیں

انہی پہ ہو کبھی نازل عذاب آگ اجل

وہی نگر کبھی ٹھہریں پیمبروں والے

سنی نہ ایک بھی ظالم نے آرزو دل کی

یہ کس کے سامنے ہم عرض حال کر بیٹھے

کیا عشق مجازی نے حقیقت آشنا مجھ کو

بتوں نے ظلم وہ ڈھایا کہ یاد آیا خدا مجھ کو

مر جائیں گے جب ہم تو بہت یاد کرے گی

جی بھر کے ستا لے شب ہجراں کوئی دن اور

ظلم سے گر ذبح بھی کر دو مجھے پروا نہیں

لطف سے ڈرتا ہوں یہ میری قضا ہو جائے گا

ظلم سہہ کے بھی میں نے ہونٹ سی لیے غازیؔ

ایک ظرف ان کا ہے ایک ظرف میرا ہے

میں ملک بدر صبر بھی کر سکتی تھی لیکن

یہ دیکھنا تھا ظلم کی سرحد ہے کہاں تک

اسی کو سونپ دی ہم نے حفاظت اپنے خیموں کی

وہ آدم خور جو لاشوں کا بیوپاری رہا برسوں