Sher on Sadness

rone vāloñ se kaho un kā bhī ronā ro leñ

jin ko majbūri-e-hālāt ne rone na diyā

rone walon se kaho un ka bhi rona ro len

jin ko majburi-e-haalat ne rone na diya

ye zindagī jo pukāre to shak sā hotā hai

kahīñ abhī to mujhe ḳhud-kushī nahīñ karnī

ye zindagi jo pukare to shak sa hota hai

kahin abhi to mujhe KHud-kushi nahin karni

kisī ne phir se lagā.ī sadā udāsī kī

palaT ke aane lagī hai fazā udāsī kī

kisi ne phir se lagai sada udasi ki

palaT ke aane lagi hai faza udasi ki

maiñ marīz huuñ tire hijr kā zarā haath meñ mirā haath le

tū ġhamoñ kā mere ilaaj kar mirī baat sun tū abhī na jā

main mariz hun tere hijr ka zara hath mein mera hath le

tu ghamon ka mere ilaj kar meri baat sun tu abhi na ja

ġham kā sāthī kaun hai ye soch kar tanhā thā maiñ

saath lekin mere 'nashtar' ro rahī thī chāñdnī

gham ka sathi kaun hai ye soch kar tanha tha main

sath lekin mere 'nashtar' ro rahi thi chandni

baḌī mushkil se aa ke baiThā huuñ

dard uThte haiñ mat uThā.eñ mujhe

baDi mushkil se aa ke baiTha hun

dard uThte hain mat uThaen mujhe

jāda-e-ġham meñ aarzū ke sivā

ham-safar dūsrā nahīñ hotā

jada-e-gham mein aarzu ke siwa

ham-safar dusra nahin hota

koī sūrat nahīñ hai juḌne kī

itne TukḌoñ meñ baT ke aayā huuñ

koi surat nahin hai juDne ki

itne TukDon mein baT ke aaya hun