Bashir Badr: Jadeed Ghazal ka Raushan Sitara

ujāle apnī yādoñ ke hamāre saath rahne do

na jaane kis galī meñ zindagī kī shaam ho jaa.e

ujale apni yaadon ke hamare sath rahne do

na jaane kis gali mein zindagi ki sham ho jae

zindagī tū ne mujhe qabr se kam dī hai zamīñ

paañv phailā.ūñ to dīvār meñ sar lagtā hai

zindagi tu ne mujhe qabr se kam di hai zamin

panw phailaun to diwar mein sar lagta hai

yahāñ libās kī qīmat hai aadmī kī nahīñ

mujhe gilās baḌe de sharāb kam kar de

yahan libas ki qimat hai aadmi ki nahin

mujhe gilas baDe de sharab kam kar de

ham to kuchh der hañs bhī lete haiñ

dil hamesha udaas rahtā hai

hum to kuchh der hans bhi lete hain

dil hamesha udas rahta hai

log TuuT jaate haiñ ek ghar banāne meñ

tum taras nahīñ khāte bastiyāñ jalāne meñ

log TuT jate hain ek ghar banane mein

tum taras nahin khate bastiyan jalane mein

abhī raah meñ ka.ī moḌ haiñ koī aa.egā koī jā.egā

tumheñ jis ne dil se bhulā diyā use bhūlne kī duā karo

abhi rah mein kai moD hain koi aaega koi jaega

tumhein jis ne dil se bhula diya use bhulne ki dua karo

agar fursat mile paanī kī tahrīroñ ko paḌh lenā

har ik dariyā hazāroñ saal kā afsāna likhtā hai

agar fursat mile pani ki tahriron ko paDh lena

har ek dariya hazaron sal ka afsana likhta hai

ḳhudā aise ehsās kā naam hai

rahe sāmne aur dikhā.ī na de

KHuda aise ehsas ka nam hai

rahe samne aur dikhai na de

ajiib shaḳhs hai nārāz ho ke hañstā hai

maiñ chāhtā huuñ ḳhafā ho to vo ḳhafā hī lage

ajib shaKHs hai naraaz ho ke hansta hai

main chahta hun KHafa ho to wo KHafa hi lage

āñkhoñ meñ rahā dil meñ utar kar nahīñ dekhā

kashtī ke musāfir ne samundar nahīñ dekhā

aankhon mein raha dil mein utar kar nahin dekha

kashti ke musafir ne samundar nahin dekha

kāġhaz meñ dab ke mar ga.e kiiḌe kitāb ke

dīvāna be-paḌhe-likhe mash.hūr ho gayā

kaghaz mein dab ke mar gae kiDe kitab ke

diwana be-paDhe-likhe mashhur ho gaya

ham bhī dariyā haiñ hameñ apnā hunar mālūm hai

jis taraf bhī chal paḌeñge rāsta ho jā.egā

hum bhi dariya hain hamein apna hunar malum hai

jis taraf bhi chal paDenge rasta ho jaega

tumhāre saath ye mausam farishtoñ jaisā hai

tumhāre ba.ad ye mausam bahut satā.egā

tumhaare sath ye mausam farishton jaisa hai

tumhaare baad ye mausam bahut sataega

sab log apne apne ḳhudāoñ ko laa.e the

ik ham hī aise the ki hamārā ḳhudā na thā

sab log apne apne KHudaon ko lae the

ek hum hi aise the ki hamara KHuda na tha

maiñ ne din raat ḳhudā se ye duā māñgī thī

koī aahaT na ho dar par mire jab tū aa.e

main ne din raat KHuda se ye dua mangi thi

koi aahaT na ho dar par mere jab tu aae

vo itr-dān sā lahja mire buzurgoñ kā

rachī-basī huī urdu zabān kī ḳhushbū

wo itr-dan sa lahja mere buzurgon ka

rachi-basi hui urdu zaban ki KHushbu

charāġhoñ ko āñkhoñ meñ mahfūz rakhnā

baḌī duur tak raat hī raat hogī

charaghon ko aankhon mein mahfuz rakhna

baDi dur tak raat hi raat hogi

vo intizār kī chaukhaT pe so gayā hogā

kisī se vaqt to pūchheñ ki kyā bajā hogā

wo intizar ki chaukhaT pe so gaya hoga

kisi se waqt to puchhen ki kya baja hoga