کوئی نہ رستہ ناپ سکا ہے، ریت پہ چلنے والوں کا

اگلے قدم پر مٹ جائے گا پہلا نقش ہمارا بھی

اتنا آساں نہیں پانی سے شبیہیں دھونا

خود بھی روئے گا مصور یہ قیامت کر کے

آدھے پیڑ پہ سبز پرندے آدھا پیڑ آسیبی ہے

کیسے کھلے یہ رام کہانی کون سا حصہ میرا ہے

غبار شہر میں اسے نہ ڈھونڈ جو خزاں کی شب

ہوا کی راہ سے ملا، ہوا کی راہ پر گیا

مختصر بات تھی، پھیلی کیوں صبا کی مانند

درد مندوں کا فسانہ تھا، اچھالا کس نے

بستیوں والے تو خود اوڑھ کے پتے، سوئے

دل آوارہ تجھے رات سنبھالا کس نے

چراغ بانٹنے والوں پہ حیرتیں نہ کرو

یہ آفتاب ہیں، شب کی دعا میں شاد رہیں

سرد راتوں کی ہوا میں اڑتے پتوں کے مثیل

کون تیرے شب نوردوں کو سنبھالے شہر میں

آسماں کے روزنوں سے لوٹ آتا تھا کبھی

وہ کبوتر اک حویلی کے چھجوں میں کھو گیا

زرد پھولوں میں بسا خواب میں رہنے والا

دھند میں الجھا رہا نیند میں چلنے والا

حجاب آ گیا تھا مجھ کو دل کے اضطراب پر

یہی سبب ہے تیرے در پہ لوٹ کر نہ آ سکا

کسی کا سایہ رہ گیا گلی کے عین موڑ پر

اسی حبیب سائے سے بنی ہماری داستاں

وہ شخص امر ہے، جو پیوے گا دو چاندوں کے نور

اس کی آنکھیں سدا گلابی جو دیکھے اک لال

دھوپ پھیلی تو کہا دیوار نے جھک کر مجھے

مل گلے میرے مسافر، میرے سائے کے حبیب

فاختائیں بولتی ہیں بجروں کے دیس میں

تو بھی سن لے آسماں یہ گیت میرے نام کا