کوئی اکیلا تو میں سادگی پسند نہ تھا

پسند اس نے بھی رنگوں میں رنگ سادہ کیا

جان کر چپ ہیں وگرنہ ہم بھی

بات کرنے کا ہنر جانتے ہیں

دور رہنا تھا جب اس کو محسنؔ

میرے نزدیک وہ آیا کیوں تھا

کوئی کشتی میں تنہا جا رہا ہے

کسی کے ساتھ دریا جا رہا ہے

جیسے دو ملکوں کو اک سرحد الگ کرتی ہوئی

وقت نے خط ایسا کھینچا میرے اس کے درمیاں

اگر چمن کا کوئی در کھلا بھی میرے لیے

سموم بن گئی باد صبا بھی میرے لیے

بچھڑنے والوں میں ہم جس سے آشنا کم تھے

نہ جانے دل نے اسے یاد کیوں زیادہ کیا

ہر شخص یہاں گنبد بے در کی طرح ہے

آواز پہ آواز دو سنتا نہیں کوئی

یہ ظلم دیکھیے کہ گھروں میں لگی ہے آگ

اور حکم ہے مکین نکل کر نہ گھر سے آئیں

سنتے ہیں کہ آباد یہاں تھا کوئی کنبہ

آثار بھی کہتے ہیں یہاں پر کوئی گھر تھا

ہم نے بھی دیکھی ہے دنیا محسنؔ

ہے کدھر کس کی نظر جانتے ہیں

تیر و کمان آپ بھی محسنؔ سنبھالیے

جب دوستی کی آڑ میں خنجر دکھائی دے

لباس بدلے نہیں ہم نے موسموں کی طرح

کہ زیب تن جو کیا ایک ہی لبادہ کیا