برا نہ مان ضیاؔ اس کی صاف گوئی کا

جو درد مند بھی ہے اور بے ادب بھی نہیں

رنگ باتیں کریں اور باتوں سے خوشبو آئے

درد پھولوں کی طرح مہکے اگر تو آئے

ہمت ہے تو بلند کر آواز کا علم

چپ بیٹھنے سے حل نہیں ہونے کا مسئلہ

عشق میں بھی کوئی انجام ہوا کرتا ہے

عشق میں یاد ہے آغاز ہی آغاز مجھے

یہ آنسو یہ پشیمانی کا اظہار

مجھے اک بار پھر بہکا گئی ہو

ضیاؔ وہ زندگی کیا زندگی ہے

جسے خود موت بھی ٹھکرا گئی ہو

تو کوئی سوکھا ہوا پتہ نہیں ہے کہ جسے

جس طرف موج ہوا چاہے اڑا کر لے جائے

ہاں مجھ پہ ستم بھی ہیں بہت وقت کے لیکن

کچھ وقت کی ہیں مجھ پہ عنایات وہ تم ہو

اتنا سوچا تجھے کہ دنیا کو

ہم نے تیری نگاہ سے دیکھا

دیکھ پھولوں سے لدے دھوپ نہائے ہوئے پیڑ

ہنس کے کہتے ہیں گزاری ہے خزاں بھی ہم نے

کیسے دکھ کتنی چاہ سے دیکھا

تجھے کس کس نگاہ سے دیکھا

تیرے دکھ کو پا کر ہم تو اپنا دکھ بھی بھول گئے

کس کو خبر تھی تیری خموشی تہہ در تہہ اک طوفاں ہے

میں آفتاب کو کیسے دکھاؤں تاریکی

تجھے میں کیسے بتاؤں کہ کیا ہے تنہائی

تیرا غم بھی نہ ہو تو کیا جینا

کچھ تسلی ہے درد ہی سے مجھے

اب یہ آنکھیں کسی تسکین سے تابندہ نہیں

میں نے رفتہ سے یہ جانا ہے کہ آئندہ نہیں

ان کہی بات کے سو روپ کہی بات کا ایک

کبھی سن وہ بھی جو منت کش گویائی نہیں

وہ خواب کیا تھا کہ جس کی حیات ہے تعبیر

وہ جرم کیا تھا کہ جس کی سزا ہے تنہائی

مشکلیں دل میں نئی شمعیں جلا دیتی ہیں

غم سے بجھ جانا تو درویشوں کا دستور نہیں

اب جو روٹھے تو جاں پہ بنتی ہے

خوش ہوا مجھ سے بے سبب کوئی

وقت بے مہر ہے اس فرصت کمیاب میں تم

میری آنکھوں میں رہو خواب مجسم کی طرح

اظہار نارسا سہی وہ صورت جمال

آئینۂ خیال میں بھی ہو بہو نہ تھی

ابر آوارہ سے مجھ کو ہے وفا کی امید

برق بے تاب سے شکوہ ہے کہ پائندہ نہیں

وہ شاخ بنے سنورے وہ شاخ پھلے پھولے

جس شاخ پہ دھوپ آئے جس شاخ کو نم پہنچے

انہیں اپنے گداز دل سے اندازہ تھا اوروں کا

جب انسانوں کے دل دیکھے تو انسانوں کے دل ٹوٹے

اب اس کا چارہ ہی کیا کہ اپنی طلب ہی لا انتہا تھی ورنہ

وہ آنکھ جب بھی اٹھی ہے دامان درد پھولوں سے بھر گئی ہے