اچھی خاصی رسوائی کا سبب ہوتی ہے

دوسری عورت پہلی جیسی کب ہوتی ہے

ہزاروں سال کی تھی آگ مجھ میں

رگڑنے تک میں اک پتھر رہا تھا

مل رہی ہے مجھے ناکردہ گناہوں کی سزا

میرے مالک مرے سجدے مجھے واپس کر دے

اب کے روٹھے تو منانے نہیں آیا کوئی

بات بڑھ جائے تو ہو جاتی ہے کم آپ ہی آپ

کوئی تو ضد میں یہ آ کر کبھی کہے ہم سے

یہ بات یوں نہیں ایسے تھی یوں ہوا ہوگا

تجھ کو منظور نہیں مجھ کو ہے اب بھی منظور

میری قربت مرے بوسے مجھے واپس کر دے

عشق کیا تو اپنی ہی نادانی تھی

ورنہ دنیا جان کی دشمن کب ہوتی ہے

کیسے آتا ہے دبے پاؤں گناہوں کا خیال

کتنی خاموشی سے دروازہ کھلا تھا پہلے

یہی دن ہیں برت لے جتنے زیور تیرا جی چاہے

ڈھلے گی عمر تو یہ چاندی سونا کون دیکھے گا

جو مرا ہے حادثے میں مرا اس سے کیا تھا رشتہ

یہ سڑک جو خوں میں تر ہے مجھے کیوں پکارتی ہے

کس انمول پشیمانی کی دولت ہے ان آنکھوں میں

پلکوں پر دو آنسو جھمکیں موتی کے سے دانے دو

مرا روتا بچہ بہلتا تھا جس سے

وہ لکڑی کا ہاتھی اٹھا لے گیا وہ

میں کہاں آیا ہوں لائے ہیں تری محفل میں

مری وحشت مرے مجبور قدم آپ ہی آپ

نمک آتا نہیں ہے راس سب دل کے مریضوں کو

بتا ایسے ترا چہرہ سلونا کون دیکھے گا

نئے بچوں کو چاہت ہے نئے مہنگے کھلونوں کی

یہ آٹھ آنے کا پھرکی کا کھلونا کون دیکھے گا