ہاتھ دنیا کا بھی ہے دل کی خرابی میں بہت

پھر بھی اے دوست تری ایک نظر سے کم ہے

آج تو جیسے دن کے ساتھ دل بھی غروب ہو گیا

شام کی چائے بھی گئی موت کے ڈر کے ساتھ ساتھ

اب تو مشکل ہے کسی اور کا ہونا مرے دوست

تو مجھے ایسے ہوا جیسے کرونا مرے دوست

موت کی پہلی علامت صاحب

یہی احساس کا مر جانا ہے

ٹینشن سے مرے گا نہ کرونے سے مرے گا

اک شخص ترے پاس نہ ہونے سے مرے گا

تو بھی ہو میں بھی ہوں اک جگہ پہ اور وقت بھی ہو

اتنی گنجائشیں رکھتی نہیں دنیا مرے دوست!

ٹوٹ سکتا ہے چھلک سکتا ہے چھن سکتا ہے

اتنا سوچے تو کوئی جام اچھالے کیسے

اس اندھیرے میں جب کوئی بھی نہ تھا

مجھ سے گم ہو گیا خدا مجھ میں

اس قدر مت اداس ہو جیسے

یہ محبت کا آخری دن ہے

میں جانتا ہوں یہ ممکن نہیں مگر اے دوست

میں چاہتا ہوں کہ وہ خواب پھر بہم کئے جائیں

تمام دوست الاؤ کے گرد جمع تھے اور

ہر ایک اپنی کہانی سنانے والا تھا

وہ مجھے دیکھ کر خموش رہا

اور اک شور مچ گیا مجھ میں

اک خوف زدہ سا شخص گھر تک

پہنچا کئی راستوں میں بٹ کر

ذرا سا مل کے دکھاؤ کہ ایسے ملتے ہیں

بہت پتا ہے تمہیں چھوڑ جانا آتا ہے

خودکشی بھی نہیں مرے بس میں

لوگ بس یوں ہی مجھ سے ڈرتے ہیں

مر گیا خاص طور پر میں بھی

جس طرح عام لوگ مرتے ہیں

میں جنہیں یاد ہوں اب تک یہی کہتے ہوں گے

شاہزادہ کبھی ناکام نہیں آ سکتا

موت اکتا چکی ریہرسل میں

روز دو چار شخص مرتے ہیں

وہ بہت دور ہے مگر مرے پاس

ایک ہی سمت کا کرایا ہے

اک دیا دل کی روشنی کا سفیر

ہو میسر تو رات بھی دن ہے

یہاں سے چاروں طرف راستے نکلتے ہیں

ٹھہر ٹھہر کے ہم اس خواب سے نکلتے ہیں

وہی خواب ہے وہی باغ ہے وہی وقت ہے

مگر اس میں اس کے بغیر جی نہیں لگ رہا

وہ جن کو میسر تھی ہر اک چیز دگر بھی

ممکن ہے سہولت کی فراوانی سے مر جائیں

پچاس میل ہے خشکی سے بحریہ ٹاؤن

بس ایک گھنٹے میں اچھا زمانہ آتا ہے

ریگ دل میں کئی نادیدہ پرندے بھی ہیں دفن

سوچتے ہوں گے کہ دریا کی زیارت کر جائیں

دل کی اک ایک خرابی کا سبب جانتے ہیں

پھر بھی ممکن ہے کہ ہم تم سے مروت کر جائیں

کہانیوں نے مری عادتیں بگاڑی تھیں

میں صرف سچ کو ظفر یاب دیکھ سکتا تھا

بریک ڈانس سکھایا ہے ناؤ نے دل کو

ہوا کا گیت سمندر کو گانا آتا ہے

آنکھوں میں اترتے ہوئے اترائیں ستارے

سورج ہوں تو جل کر تری پیشانی سے مر جائیں

مرے سوال وہی ٹوٹ پھوٹ کی زد میں

جواب ان کے وہی ہیں بنے بنائے ہوئے

وہی نہ ہو کہ یہ سب لوگ سانس لینے لگیں

امیر شہر کوئی اور خوف طاری کر

ہاں اے غبار آشنا میں بھی تھا ہم سفر ترا

پی گئیں منزلیں تجھے کھا گئے راستے مجھے

درد کا دل کا شام کا بزم کا مے کا جام کا

رنگ بدل بدل گیا ایک نظر کے ساتھ ساتھ

یہ کرن کہیں مرے دل میں آگ لگا نہ دے

یہ معائنہ مجھے سرسری نہیں لگ رہا

پھول ہے جو کتاب میں اصل ہے کہ خواب ہے

اس نے اس اضطراب میں کچھ نہ پڑھا لکھا تو پھر

دھول اڑتی ہے تو یاد آتا ہے کچھ

ملتا جلتا تھا لبادہ میرا

کدھر گیا وہ کوزہ گر خبر نہیں

کوئی سراغ چاک سے نہیں ملا

کوئی بھی دل میں ذرا جم کے خاک اڑاتا تو

ہزار گوہر نایاب دیکھ سکتا تھا

پر نہیں ہوتے خیالوں کے تو پھر

کیسے اڑتے ہیں غبارا سمجھو

کام کی بات پوچھتے کیا ہو

کچھ ہوا کچھ نہیں ہوا یعنی