لڑکیاں ماؤں جیسے مقدر کیوں رکھتی ہیں

تن صحرا اور آنکھ سمندر کیوں رکھتی ہیں

بھوک سے یا وبا سے مرنا ہے

فیصلہ آدمی کو کرنا ہے

اکیلے گھر میں بھری دوپہر کا سناٹا

وہی سکون وہی عمر بھر کا سناٹا

شام کو تیرا ہنس کر ملنا

دن بھر کی اجرت ہوتی ہے

کچی عمروں میں بھی اکیلی رہی

میں سدا اپنی ہی سہیلی رہی

یہ اور بات کہ کم حوصلہ تو میں بھی تھی

مگر یہ سچ ہے اسے پہلے میں نے چاہا تھا

تیرا نام لکھتی ہیں انگلیاں خلاؤں میں

یہ بھی اک دعا ہوگی وصل کی دعاؤں میں

آؤ ذرا سی دیر کو ہم ہنس بول ہی لیں

تم کو نہیں منظور ہے اچھا رہنے دو

اپنی آگ کو زندہ رکھنا کتنا مشکل ہے

پتھر بیچ آئینہ رکھنا کتنا مشکل ہے

وہ جس نے اشکوں سے ہار نہیں مانی

کس خاموشی سے دریا میں ڈوب گئی

خواہشیں دل میں مچل کر یونہی سو جاتی ہیں

جیسے انگنائی میں روتا ہوا بچہ کوئی

وہ زخم چن کے مرے خار مجھ میں چھوڑ گیا

کہ اس کو شوق تھا بے انتہا گلابوں کا

یا مجھے تیری ہتھیلی بوجھے

یا کوئی شوخ سہیلی بوجھے