vo ḳhush ho ke mujh se ḳhafā ho gayā

mujhe kyā umīdeñ thiiñ kyā ho gayā

wo KHush ho ke mujh se KHafa ho gaya

mujhe kya umiden thin kya ho gaya

us ko ḳhizāñ ke aane kā kyā ranj kyā qalaq

rote kaTā ho jis ko zamāna bahār kā

us ko KHizan ke aane ka kya ranj kya qalaq

rote kaTa ho jis ko zamana bahaar ka

toḌā hai dam abhī abhī bīmār-e-hijr ne

aa.e magar huzūr ko tāḳhīr ho ga.ī

toDa hai dam abhi abhi bimar-e-hijr ne

aae magar huzur ko taKHir ho gai

pesh to hogā adālat meñ muqadmā be-shak

jurm qātil hī ke sar ho ye zarūrī to nahīñ

pesh to hoga adalat mein muqadma be-shak

jurm qatil hi ke sar ho ye zaruri to nahin

sāmne tārīf ġhībat meñ gila

aap ke dil kī safā.ī dekh lī

samne tarif ghibat mein gila

aap ke dil ki safai dekh li

agar kuchh roz zinda rah ke mar jaanā muqaddar hai

to is duniyā meñ āḳhir bā.is-e-taḳhlīq-e-jāñ kyā thā

agar kuchh roz zinda rah ke mar jaana muqaddar hai

to is duniya mein aaKHir bais-e-taKHliq-e-jaan kya tha

hañse bhī ro.e bhī lekin na samjhe

ḳhushī kyā chiiz hai duniyā meñ ġham kyā

hanse bhi roe bhi lekin na samjhe

KHushi kya chiz hai duniya mein gham kya

yahī hastī isī hastī ke kuchh TuuTe hue rishte

vagarna aisā parda mere un ke darmiyāñ kyā thā

yahi hasti isi hasti ke kuchh TuTe hue rishte

wagarna aisa parda mere un ke darmiyan kya tha

kuchh iztirāb-e-ishq kā aalam na pūchhiye

bijlī taḌap rahī thī ki jaan is badan meñ thī

kuchh iztirab-e-ishq ka aalam na puchhiye

bijli taDap rahi thi ki jaan is badan mein thi

abhī tak fasl-e-gul meñ ik sadā-e-dard aatī hai

vahāñ kī ḳhaak se pahle jahāñ thā āshiyāñ merā

abhi tak fasl-e-gul mein ek sada-e-dard aati hai

wahan ki KHak se pahle jahan tha aashiyan mera

vo bāda-nosh haqīqat hai is jahāñ meñ 'ravāñ'

ki jhuum jaa.e falak gar use ḳhumār aa.e

wo baada-nosh haqiqat hai is jahan mein 'rawan'

ki jhum jae falak gar use KHumar aae

aa.eñ pasand kyā use duniyā kī rāhateñ

jo lazzat-āshnā-e-sitam-hā-e-nāz thā

aaen pasand kya use duniya ki rahaten

jo lazzat-ashna-e-sitam-ha-e-naz tha