ik lafz-e-mohabbat ke bane laakh fasaane tohmat ke bahaane kabhii shohrat ke bahaane kis ko ye KHabar thii ki bikhar jaa.e.nge pal me.n aa.nkho.n ne sajaa rakkhe the jo KHvaab suhaane ik zaKHm-e-judaa.ii hai ki naasuur banaa hai kartaa huu.n tujhe yaad isii Gam ke bahaane aqdaar kaa fuqdaan havasnaakii-o-vahshat sab parde haTaa rakkhe hai.n ab sharm-o-hayaa ne furqat kii shab-e-karb ke jaate hu.e lamho kab lauT ke aa.oge mujhe phir se rulaane bhaane lagii jab dil ko zaraa bazm kii raunaq tanhaa.ii mirii aa ga.ii phir mujh ko manaane vo gul huu.n jo Thahraayaa gayaa ta.ng-e-bahaaraa.n paamaal kiyaa KHud hii jise baad-e-sabaa ne shaakir huu.n mai.n har haal me.n raazii-ba-razaa huu.n taskiin kii daulat mujhe baKHshii hai KHudaa ne aazaar-e-Gam-e-dil ko na honaa thaa shifaayaab kuchh kaam kiyaa 'chaa.nd' davaa ne na du.aa ne