لائی ہے کہاں مجھ کو طبیعت کی دو رنگی

دنیا کا طلب گار بھی دنیا سے خفا بھی

خوابوں کی تجارت میں یہی ایک کمی ہے

چلتی ہے دکاں خوب کمائی نہیں دیتی

تو سمجھتا ہے مجھے حرف مکرر لیکن

میں صحیفہ ہوں ترے دل پہ اترنے والا

جسم اس کی گود میں ہو روح تیرے رو بہ رو

فاحشہ کے گرم بستر پر ریاکاری کروں

تیری اوقات ہی کیا مدحت الاختر سن لے

شہر کے شہر زمینوں کے تلے دب گئے ہیں

جانے والے مجھے کچھ اپنی نشانی دے جا

روح پیاسی نہ رہے آنکھ میں پانی دے جا

تم مل گئے تو کوئی گلہ اب نہیں رہا

میں اپنی زندگی سے خفا اب نہیں رہا

آنکھیں ہیں مگر خواب سے محروم ہیں مدحتؔ

تصویر کا رشتہ نہیں رنگوں سے ذرا بھی

میں نے ساحل سے اسے ڈوبتے دیکھا تھا فقط

مجھے غرقاب کرے گا یہی منظر اس کا

مرے وجود میں شامل رہے ہیں کتنے وجود

تو پھر یہ کیسے کہوں جو کیا کیا میں نے

کوچ کرنے کی گھڑی ہے مگر اے ہم سفرو

ہم ادھر جا نہیں سکتے جدھر سب گئے ہیں

ہم کو اسی دیار کی مٹی ہوئی عزیز

نقشے میں جس کا نام پتہ اب نہیں رہا