تجھ سے اب اور محبت نہیں کی جا سکتی

خود کو اتنی بھی اذیت نہیں دی جا سکتی

اس شہر میں کتنے چہرے تھے کچھ یاد نہیں سب بھول گئے

اک شخص کتابوں جیسا تھا وہ شخص زبانی یاد ہوا

میں فیصلے کی گھڑی سے گزر چکی ہوں مگر

کسی کا دیدۂ حیراں مری تلاش میں ہے

کچھ نہیں چاہئے تجھ سے اے مری عمر رواں

مرا بچپن مرے جگنو مری گڑیا لا دے

جلائے رکھوں گی صبح تک میں تمہارے رستوں میں اپنی آنکھیں

مگر کہیں ضبط ٹوٹ جائے تو بارشیں بھی شمار کرنا

یہ ہم ہی جانتے ہیں جدائی کے موڑ پر

اس دل کا جو بھی حال تجھے دیکھ کر ہوا

یہ آرزو تھی کہ ہم اس کے ساتھ ساتھ چلیں

مگر وہ شخص تو رستہ بدلتا جاتا ہے

کسی حرف میں کسی باب میں نہیں آئے گا

ترا ذکر میری کتاب میں نہیں آئے گا

دل کا کیا ہے دل نے کتنے منظر دیکھے لیکن

آنکھیں پاگل ہو جاتی ہیں ایک خیال سے پہلے

یہ سردیوں کا اداس موسم کہ دھڑکنیں برف ہو گئی ہیں

جب ان کی یخ بستگی پرکھنا تمازتیں بھی شمار کرنا

میں تنہا لڑکی دیار شب میں جلاؤں سچ کے دیئے کہاں تک

سیاہ کاروں کی سلطنت میں میں کس طرح آفتاب لکھوں

اسے لاکھ دل سے پکار لو اسے دیکھ لو

کوئی ایک حرف جواب میں نہیں آئے گا

تتلیاں جگنو سبھی ہوں گے مگر دیکھے گا کون

ہم سجا بھی لیں اگر دیوار و در دیکھے گا کون

بند ہوتی کتابوں میں اڑتی ہوئی تتلیاں ڈال دیں

کس کی رسموں کی جلتی ہوئی آگ میں لڑکیاں ڈال دیں