میں نے اے دل تجھے سینے سے لگایا ہوا ہے

اور تو ہے کہ مری جان کو آیا ہوا ہے

غم سبھی دل سے رخصت ہوئے

درد بے انتہا رہ گیا

بس ایک شام کا ہر شام انتظار رہا

مگر وہ شام کسی شام بھی نہیں آئی

اس نے پوچھا تھا کیا حال ہے

اور میں سوچتا رہ گیا

کسی کے ہجر میں جینا محال ہو گیا ہے

کسے بتائیں ہمارا جو حال ہو گیا ہے

یہ اداسی کا سبب پوچھنے والے اجملؔ

کیا کریں گے جو اداسی کا سبب بتلایا

کچھ کہنا چاہتے تھے کہ خاموش ہو گئے

دستار یاد آ گئی سر یاد آ گیا

یہ جو ہم کھوئے کھوئے رہتے ہیں

اس میں کچھ دخل ہے تمہارا بھی

لوگ جیتے ہیں کس طرح اجملؔ

ہم سے ہوتا نہیں گزارا بھی

یہ بھی طے ہے کہ جو بوئیں گے وہ کاٹیں گے یہاں

اور یہ بھی کہ جو کھوئیں گے وہی پائیں گے

بدل جائیں گے یہ دن رات اجملؔ

کوئی نا مہرباں کب تک رہے گا

اب آپ خود ہی بتائیں یہ زندگی کیا ہے

کرم بھی اس نے کئے ہیں مگر ستم جیسے

بتاؤ تم سے کہاں رابطہ کیا جائے

کبھی جو تم سے ضرورت ہو بات کرنے کی

اجملؔ سراج ہم اسے بھول ہوئے تو ہیں

کیا جانے کیا کریں گے اگر یاد آ گیا

کیا کہے گا کبھی ملنے بھی اگر آئے گا وہ

اب وفاداری کی قسمیں تو نہیں کھائے گا وہ

زندگی ہم سے چاہتی کیا ہے

چاہتی کیا ہے زندگی ہم سے

مری مثال تو ایسی ہے جیسے خواب کوئی

مرا وجود سمجھ لیجئے عدم جیسے

دکھا دوں گا تماشا دی اگر فرصت زمانے نے

تماشائے فراواں کو فراواں کر کے چھوڑوں گا

کون آتا ہے اس خرابے میں

اس خرابے میں کون آتا ہے

سب کے ہوتے ہوئے اک روز وہ تنہا ہوگا

پھر وہ ڈھونڈے گا ہمیں اور نہیں پائے گا وہ

ٹھہر گیا ہے دل کا جانا

دل کا جانا ٹھہر گیا ہے

رہ گیا دل میں اک درد سا

دل میں اک درد سا رہ گیا