اس کو خزاں کے آنے کا کیا رنج کیا قلق

روتے کٹا ہو جس کو زمانہ بہار کا

ابھی تک فصل گل میں اک صدائے درد آتی ہے

وہاں کی خاک سے پہلے جہاں تھا آشیاں میرا

آئیں پسند کیا اسے دنیا کی راحتیں

جو لذت آشنائے ستم ہائے ناز تھا

کچھ اضطراب عشق کا عالم نہ پوچھئے

بجلی تڑپ رہی تھی کہ جان اس بدن میں تھی

ہنسے بھی روئے بھی لیکن نہ سمجھے

خوشی کیا چیز ہے دنیا میں غم کیا

پیش تو ہوگا عدالت میں مقدمہ بیشک

جرم قاتل ہی کے سر ہو یہ ضروری تو نہیں

وہ خوش ہو کے مجھ سے خفا ہو گیا

مجھے کیا امیدیں تھیں کیا ہو گیا

یہی ہستی اسی ہستی کے کچھ ٹوٹے ہوئے رشتے

وگرنہ ایسا پردہ میرے ان کے درمیاں کیا تھا

سامنے تعریف غیبت میں گلہ

آپ کے دل کی صفائی دیکھ لی

اگر کچھ روز زندہ رہ کے مر جانا مقدر ہے

تو اس دنیا میں آخر باعث تخلیق جاں کیا تھا

توڑا ہے دم ابھی ابھی بیمار ہجر نے

آئے مگر حضور کو تاخیر ہو گئی

وہ بادہ نوش حقیقت ہے اس جہاں میں رواںؔ

کہ جھوم جائے فلک گر اسے خمار آئے