پاگل وحشی تنہا تنہا اجڑا اجڑا دکھتا ہوں

کتنے آئینے بدلے ہیں میں ویسے کا ویسا ہوں

تجھے گلے سے لگا کے بھی دیکھا جائے گا

ابھی تو مجھ کو ترا انتظار کرنا ہے

آج پھر خود سے خفا ہوں تو یہی کرتا ہوں

آج پھر خود سے کوئی بات نہیں کرتا میں

میرا پنجرہ کھول دیا ہے تم بھی عجیب شکاری ہو

اپنے ہی پر کاٹ لیے ہیں میں بھی عجیب پرندہ ہوں

حسن ہوتا ہے کسی شے کا کوئی اپنا ہی

اور پھر دیکھنے والے کی نظر ہوتی ہے

اور بھٹکیں گے تو کچھ اور نیا دیکھیں گے

ہم تو آوارہ پرندے ہیں ہمارا کیا ہے

بناتا ہوں میں تصور میں اس کا چہرہ مگر

ہر ایک بار نئی کائنات بنتی ہے

آپ نے اس کے فسانے ہی سنے ہوتے ہیں

اور اچانک یہ بلا آپ کے سر ہوتی ہے

یوں اپنے آپ کو برباد کرتا ہے کوئی

اے میرے دل تو سمجھ دار ہے نہیں ہے کیا

ہم تو کہتے ہیں محبت میں مزا ہے ہی نہیں

آپ کہتے ہیں تو پھر مان لیا جاتا ہے

خوب مشکل ہے پر آسان لیا جاتا ہے

کتنا ہلکے میں یہ انسان لیا جاتا ہے

اب تو میں اور بھی برا ہوں کہ

اب زیادہ سدھر گیا ہوں میں

تم نے تو آپ ہی پنجرے کو کھلا چھوڑ دیا

کوئی ایسے بھی پرندوں کو رہا کرتا ہے

مجھ سے کہتے نہیں بنتا کہ ستم کم کیجے

پھر نہ ایسا ہو کسی روز مرا غم کیجے