پانی کو آگ کہہ کے مکر جانا چاہئے

پلکوں پہ اشک بن کے ٹھہر جانا چاہئے

آ مرے چاند رات سونی ہے

بات بنتی نہیں ستاروں سے

ہائے یہ طویل و سرد راتیں

اور ایک حیات مختصر میں

ایک بھی آفتاب بن نہ سکا

لاکھ ٹوٹے ہوئے ستاروں سے

باتوں سے سوا ہوتی ہے کچھ وحشت دل اور

احباب پریشاں ہیں مرے طرز عمل سے

ان کی محفل میں ظفرؔ لوگ مجھے چاہتے ہیں

وہ جو کل کہتے تھے دیوانہ بھی سودائی بھی

سانس لینے کو ہی جینا نہیں کہتے ہیں ظفرؔ

زندگی تھی جو ترے وصل کا امکاں ہوتا

ہے گلو گیر بہت رات کی پہنائی بھی

تیرا غم بھی ہے مجھے اور غم تنہائی بھی

زہر ہے میرے رگ و پے میں محبت شاید

اپنے ہی ڈنک سے بچھو کی طرح مر جاؤں

تھک کے پتھر کی طرح بیٹھا ہوں رستے میں ظفرؔ

جانے کب اٹھ سکوں کیا جانیے کب گھر جاؤں

آنکھوں میں ترے جلوے لیے پھرتے ہیں ہم لوگ

ہم لوگ کہ رسوا سر بازار ہوئے ہیں

دور ہو کر بھی سنیں تم نے حکایات وفا

قرب میں بھی وہی عنواں ہے قریب آ جاؤ