aa gaya zulf ke dam mein dil-e-nadan apna

aa gayā zulf ke dam meñ dil-e-nādāñ apnā

apne hāthoñ se kiyā haal pareshāñ apnā

vo dikhāte haiñ kise jalva-e-pinhāñ apnā

kyā kareñ haal bayāñ mūsī-e-imrāñ apnā

jī uThe dekh ke ham kūcha-e-jānāñ kī bahār

aañkh ke sāmne thā chashma-e-haivāñ apnā

ishq meñ hausla-e-zabt na ho kyā ma.anī

hai vo majnūñ jo kare chaak garebāñ apnā

haa.e muñh Dhāñk ke rone kī bhī sūrat na rahī

dasht meñ chhīn liyā ḳhaar ne dāmāñ apnā

phuul ke husn pe sarmast haiñ murġhān-e-chaman

kis se afsāna kahe bulbul-e-nālāñ apnā

din ko ham bādiya-paimā.ī kiyā karte haiñ

bistar ab raat ko hai reg-e-bayābāñ apnā

tum sambhāloge to dil apnā sambhal jā.egā

varna qaabū nahīñ dil par shab-e-hijrāñ apnā

abhī kamsin ho shabāb aa.egā aate aate

rañg badlegā abhī ālam-e-imkāñ apnā

dekhne ke liye rahmat ke karishme haiñ bahut

kaun dekhegā vahāñ nāma-e-isyāñ apnā

saaf rusvā.ī ke āsār nazar aate haiñ

kahne sunñe meñ nahīñ hai dil-e-nādāñ apnā

yaad aane lagī yārān-e-vatan kī sohbat

dasht-e-ġhurbat meñ hai allāh nigahbāñ apnā

kaun hotā hai musībat meñ bashar kā hamdam

shab-e-furqat ke sivā kaun hai pursāñ apnā

kyuuñ milā hai hameñ āḳhir ye kafan kā parda

maut kī aañkh meñ khaTkā tan-e-uryāñ apnā

dil koī chiiz nahīñ terī mohabbat ke baġhair

maiñ to samjhā thā ġham-e-ishq ko mehmāñ apnā

bāda-noshī se ye e.azāz milā hai zāhid

aap ko shaiḳh samajhte haiñ musalmāñ apnā

aaj har qatre se aatī hai anal-haq kī sadā

ye dikhātā hai asar ḳhūn-e-shahīdāñ apnā

malak-ul-maut kī sūrat se maiñ ghabrātā huuñ

aap rakhte mujhe sharminda-e-ehsāñ apnā

daur-e-sāġhar meñ nazar aa.e nizām-e-qudrat

saath is tarah se de gardish-e-daurāñ apnā

āshiq-e-zār pe rah rah ke nazar paḌtī hai

DhūñDhtī hai koī hamdam shab-e-hijrāñ apnā

ham-qafas jitne haiñ sayyād se tharrāte haiñ

kyā kahūñ kis se kahūñ hāl-e-pareshāñ apnā

ham ne 'rāsiḳh' tire ustād kā dekhā hai kalām

aaj ham-sar nahīñ rakhtā vo suḳhan-dāñ apnā

ġhair kī bazm ke muhtāj nahīñ ham 'rāsiḳh'

shād-o-ābād rahe kulba-e-ahzāñ apnā

mai-kashī hai tire chehra se numāyāñ 'rāsiḳh'

tū ne kyā haal kiyā hai ye merī jaañ apnā

aa gaya zulf ke dam mein dil-e-nadan apna

apne hathon se kiya haal pareshan apna

wo dikhate hain kise jalwa-e-pinhan apna

kya karen haal bayan musi-e-imran apna

ji uThe dekh ke hum kucha-e-jaanan ki bahaar

aankh ke samne tha chashma-e-haiwan apna

ishq mein hausla-e-zabt na ho kya mani

hai wo majnun jo kare chaak gareban apna

hae munh Dhank ke rone ki bhi surat na rahi

dasht mein chhin liya KHar ne daman apna

phul ke husn pe sarmast hain murghan-e-chaman

kis se afsana kahe bulbul-e-nalan apna

din ko hum baadiya-paimai kiya karte hain

bistar ab raat ko hai reg-e-bayaban apna

tum sambhaaloge to dil apna sambhal jaega

warna qabu nahin dil par shab-e-hijran apna

abhi kamsin ho shabab aaega aate aate

rang badlega abhi aalam-e-imkan apna

dekhne ke liye rahmat ke karishme hain bahut

kaun dekhega wahan nama-e-isyan apna

saf ruswai ke aasar nazar aate hain

kahne sunne mein nahin hai dil-e-nadan apna

yaad aane lagi yaran-e-watan ki sohbat

dasht-e-ghurbat mein hai allah nigahban apna

kaun hota hai musibat mein bashar ka hamdam

shab-e-furqat ke siwa kaun hai pursan apna

kyun mila hai hamein aaKHir ye kafan ka parda

maut ki aankh mein khaTka tan-e-uryan apna

dil koi chiz nahin teri mohabbat ke baghair

main to samjha tha gham-e-ishq ko mehman apna

baada-noshi se ye eazaz mila hai zahid

aap ko shaiKH samajhte hain musalman apna

aaj har qatre se aati hai anal-haq ki sada

ye dikhata hai asar KHun-e-shahidan apna

malak-ul-maut ki surat se main ghabraata hun

aap rakhte mujhe sharminda-e-ehsan apna

daur-e-saghar mein nazar aae nizam-e-qudrat

sath is tarah se de gardish-e-dauran apna

aashiq-e-zar pe rah rah ke nazar paDti hai

DhunDhti hai koi hamdam shab-e-hijran apna

ham-qafas jitne hain sayyaad se tharraate hain

kya kahun kis se kahun haal-e-pareshan apna

hum ne 'rasiKH' tere ustad ka dekha hai kalam

aaj ham-sar nahin rakhta wo suKHan-dan apna

ghair ki bazm ke muhtaj nahin hum 'rasiKH'

shad-o-abaad rahe kulba-e-ahzan apna

mai-kashi hai tere chehra se numayan 'rasiKH'

tu ne kya haal kiya hai ye meri jaan apna