aae hain fatiha ko wo gesu sanwar ke

aa.e haiñ fātiha ko vo gesū sañvār ke

chamke nasīb aaj hamāre mazār ke

dekho karishme rahmat-e-parvardigār ke

kyā aaḌe aa.ī hashr meñ mujh sharmsār ke

tasvīr ban ga.e haiñ vo zikr-e-visāl par

qurbān jā.iye nigah-e-sharmsār ke

rone lage vo dekh ke hāl-e-zabūñ mirā

ehsān mujh pe haiñ sitam-e-rozgār ke

taskīn ḳhaak bāda-e-kausar se ho unheñ

jin ko maze hoñ yaad mai-e-ḳhush-gavār ke

kahte na the ki aap taġhāful na kījiye

ab kyoñ gile haiñ nāla-e-be-iḳhtiyār ke

sone de shor-e-hashr zarā chain se hameñ

jaage hue bahut haiñ shab-e-intizār ke

hushiyār kar diyā kisī ġhaflat-shi.ār ko

mamnūn ham haiñ nāla-e-be-iḳhtiyār ke

sayyād bāl-o-par mire ab kāTtā hai kyoñ

din to guzar chuke haiñ sitamgar bahār ke

jhuñjhlā ke bol uTThe ki le rakh tū apnā dil

jhagḌe mujhe pasand nahīñ baar baar ke

ā.īna le ke zulf-e-girah-gīr dekh leñ

pūchheñ sabab na aap mire intishār ke

sargarm-e-sair vo haiñ udhar lāla-zār meñ

laale idhar paḌe haiñ dil-e-dāġh-dār ke

shāmat savār ho na kahīñ tujh pe vā.izā

yuuñ pīchhe tū paḌā hai jo har bāda-ḳhvār ke

be-iḳhtiyār pahlū-e-dushman se vo uThe

the sho.abde ye nāla-e-be-iḳhtiyār ke

'nashtar' tumhārā zabt-e-fuġhāñ be-sabab nahīñ

āshiq zarūr tum ho kisī parda-dār ke

aae hain fatiha ko wo gesu sanwar ke

chamke nasib aaj hamare mazar ke

dekho karishme rahmat-e-parwardigar ke

kya aaDe aai hashr mein mujh sharmsar ke

taswir ban gae hain wo zikr-e-visal par

qurban jaiye nigah-e-sharmsar ke

rone lage wo dekh ke haal-e-zabun mera

ehsan mujh pe hain sitam-e-rozgar ke

taskin KHak baada-e-kausar se ho unhen

jin ko maze hon yaad mai-e-KHush-gawar ke

kahte na the ki aap taghaful na kijiye

ab kyon gile hain nala-e-be-iKHtiyar ke

sone de shor-e-hashr zara chain se hamein

jage hue bahut hain shab-e-intizar ke

hushiyar kar diya kisi ghaflat-shiar ko

mamnun hum hain nala-e-be-iKHtiyar ke

sayyaad baal-o-par mere ab kaTta hai kyon

din to guzar chuke hain sitamgar bahaar ke

jhunjhla ke bol uTThe ki le rakh tu apna dil

jhagDe mujhe pasand nahin bar bar ke

aaina le ke zulf-e-girah-gir dekh len

puchhen sabab na aap mere intishaar ke

sargarm-e-sair wo hain udhar lala-zar mein

lale idhar paDe hain dil-e-dagh-dar ke

shamat sawar ho na kahin tujh pe waiza

yun pichhe tu paDa hai jo har baada-KHwar ke

be-iKHtiyar pahlu-e-dushman se wo uThe

the shoabde ye nala-e-be-iKHtiyar ke

'nashtar' tumhaara zabt-e-fughan be-sabab nahin

aashiq zarur tum ho kisi parda-dar ke