aaj baam-e-harf par imkan bhar main bhi to hun

aaj bām-e-harf par imkān bhar maiñ bhī to huuñ

merī jānib ik nazar ai dīda-var maiñ bhī to huuñ

be-amāñ saa.e kā bhī rakh bād-e-vahshat kuchh ḳhayāl

dekh kar chal darmiyān-e-bām-o-dar maiñ bhī to huuñ

raat ke pichhle pahar pur-shor sannāToñ ke biich

tū akelī to nahīñ ai chashm-e-tar maiñ bhī to huuñ

tū agar merī talab meñ phir rahā hai dar-ba-dar

apnī ḳhātir hī sahī par dar-ba-dar maiñ bhī to huuñ

terī is tasvīr meñ manzar mukammal kyuuñ nahīñ

maiñ kahāñ huuñ ye batā ai naqsh-gar maiñ bhī to huuñ

sun asīr-e-ḳhush-adā.ī muntashir tū hī nahīñ

maiñ jo ḳhush-atvār huuñ zer-o-zabar maiñ bhī to huuñ

ḳhud-pasandī merī fitrat kā bhī vasf-e-ḳhās hai

be-ḳhabar tū hī nahīñ hai be-ḳhabar maiñ bhī to huuñ

dekhtī hai juuñ hī paspā.ī pe āmāda mujhe

ruuh kahtī hai badan se be-hunar maiñ bhī to huuñ

dasht-e-hairat ke safar meñ kab tujhe tanhā kiyā

ai junūñ maiñ bhī to huuñ ai ham-safar maiñ bhī to huuñ

kūza-gar be-sūratī sairāb hone kī nahīñ

ab mujhe bhī shakl de is chaak par maiñ bhī to huuñ

yuuñ sadā detā hai aksar koī mujh meñ se mujhe

tujh ko ḳhush rakkhe ḳhudā yūñhī magar maiñ bhī to huuñ

aaj baam-e-harf par imkan bhar main bhi to hun

meri jaanib ek nazar ai dida-war main bhi to hun

be-aman sae ka bhi rakh baad-e-wahshat kuchh KHayal

dekh kar chal darmiyan-e-baam-o-dar main bhi to hun

raat ke pichhle pahar pur-shor sannaTon ke bich

tu akeli to nahin ai chashm-e-tar main bhi to hun

tu agar meri talab mein phir raha hai dar-ba-dar

apni KHatir hi sahi par dar-ba-dar main bhi to hun

teri is taswir mein manzar mukammal kyun nahin

main kahan hun ye bata ai naqsh-gar main bhi to hun

sun asir-e-KHush-adai muntashir tu hi nahin

main jo KHush-atwar hun zer-o-zabar main bhi to hun

KHud-pasandi meri fitrat ka bhi wasf-e-KHas hai

be-KHabar tu hi nahin hai be-KHabar main bhi to hun

dekhti hai jun hi paspai pe aamada mujhe

ruh kahti hai badan se be-hunar main bhi to hun

dasht-e-hairat ke safar mein kab tujhe tanha kiya

ai junun main bhi to hun ai ham-safar main bhi to hun

kuza-gar be-surati sairab hone ki nahin

ab mujhe bhi shakl de is chaak par main bhi to hun

yun sada deta hai aksar koi mujh mein se mujhe

tujh ko KHush rakkhe KHuda yunhi magar main bhi to hun