aaj rota hai mere dil ko jalane wala

aaj rotā hai mire dil ko jalāne vaalā

paanī ko dauḌtā hai aag lagāne vaalā

kab vo ham ko bhalā ḳhātir meñ hai laane vaalā

kaun duniyā meñ rahā naaz uThāne vaalā

kaise miltā hai zamāne ko nibhāne vaalā

jo milā ham ko milā dil kā dukhāne vaalā

koī nā-fahm kahāñ baat ko terī samjhe

kyā hī andāz hai har baat uḌāne vaalā

phir ke dekhā na kabhī koī ho jiitā martā

kaisā be-rahm hai muñh pher ke jaane vaalā

ḳhauf kis kā hai tumheñ hiila bahāna na karo

aa hī jaatā hai har ik taur se aane vaalā

ai sabā kah de ki ḳhāmosh rahe murġh-e-sahar

kaun hotā hai vo sote ko jagāne vaalā

pahlū-e-qabr meñ ik roz hai sonā sab ko

nāznīñ koī ho yā naaz uThāne vaalā

naza.a meñ dekh ke 'dīvān' ko ro kar bole

rūThā jaatā hai mirā aaj manāne vaalā

aaj rota hai mere dil ko jalane wala

pani ko dauDta hai aag lagane wala

kab wo hum ko bhala KHatir mein hai lane wala

kaun duniya mein raha naz uThane wala

kaise milta hai zamane ko nibhane wala

jo mila hum ko mila dil ka dukhane wala

koi na-fahm kahan baat ko teri samjhe

kya hi andaz hai har baat uDane wala

phir ke dekha na kabhi koi ho jita marta

kaisa be-rahm hai munh pher ke jaane wala

KHauf kis ka hai tumhein hila bahana na karo

aa hi jata hai har ek taur se aane wala

ai saba kah de ki KHamosh rahe murgh-e-sahar

kaun hota hai wo sote ko jagane wala

pahlu-e-qabr mein ek roz hai sona sab ko

naznin koi ho ya naz uThane wala

naza mein dekh ke 'diwan' ko ro kar bole

ruTha jata hai mera aaj manane wala