aariz-e-gul mein jhalak hai shah ke ruKHsar ki

āriz-e-gul meñ jhalak hai shaah ke ruḳhsār kī

ye koī tārīf hai itne baḌe sarkār kī

shaah kī tārīf kā aalī se aalī ho bayāñ

ye to vo tārīf hai jaise kisī dildār kī

mid.hat-e-shah aise lafzoñ meñ ho ye zebā nahīñ

zeb de sardār ko vo mad.h ho sardār kī

gar kisī ko vasf karnā hai to lāzim hai use

adl kī mid.hat kare yā bazl yā talvār kī

banda-parvar ādil-o-bāzil shajī.a-o-dīñ-panāh

haiñ ye tārīfeñ hamāre rahm-dil sarkār kī

banda-parvar aise haiñ un kā koī saanī nahīñ

muttafiq hai sab dakan hājat nahīñ iz.hār kī

adl kā misl-e-dar-e-tauba hai darvāza khulā

kuchh zarūrat hī nahīñ iz.hār kī takrār kī

sher bakrī mil ke paanī piite haiñ ik ghaaT ab

ye haqīqī vasf hai mid.hat hai is sarkār kī

is tarah ke haiñ saḳhī qatre ko dariyā kar diyā

ho sake kyā mid.hat un ke dast-e-dariyā-bār kī

be-ta.assub aise jaise aa.ina hai be-ġhubār

ho ga.ī hai rishta-dārī sub.ha-o-zunnār kī

'shād' mere shaah ko rakkhe hamesha kirdgār

umr-o-azmat ho fuzūñ yā-rab mire sarkār kī

aariz-e-gul mein jhalak hai shah ke ruKHsar ki

ye koi tarif hai itne baDe sarkar ki

shah ki tarif ka aali se aali ho bayan

ye to wo tarif hai jaise kisi dildar ki

midhat-e-shah aise lafzon mein ho ye zeba nahin

zeb de sardar ko wo madh ho sardar ki

gar kisi ko wasf karna hai to lazim hai use

adl ki midhat kare ya bazl ya talwar ki

banda-parwar aadil-o-bazil shajia-o-din-panah

hain ye tarifen hamare rahm-dil sarkar ki

banda-parwar aise hain un ka koi sani nahin

muttafiq hai sab dakan hajat nahin izhaar ki

adl ka misl-e-dar-e-tauba hai darwaza khula

kuchh zarurat hi nahin izhaar ki takrar ki

sher bakri mil ke pani pite hain ek ghaT ab

ye haqiqi wasf hai midhat hai is sarkar ki

is tarah ke hain saKHi qatre ko dariya kar diya

ho sake kya midhat un ke dast-e-dariya-bar ki

be-tassub aise jaise aaina hai be-ghubar

ho gai hai rishta-dari subha-o-zunnar ki

'shad' mere shah ko rakkhe hamesha kirdgar

umr-o-azmat ho fuzun ya-rab mere sarkar ki