aate hain laKHt-e-jigar kaT kaT ke mushkil se alag

aate haiñ laḳht-e-jigar kaT kaT ke mushkil se alag

jū-e-ḳhūñ āñkhoñ ko hotī hai ravāñ dil se alag

rakhiye kyoñ tasvīr-e-yār ā.īna-e-dil se alag

naqsh-e-hairat kab huā hai māh-e-kāmil se alag

jān-e-pur-hasrat huī yuuñ jism-e-bismil se alag

haath dāman se judā sar pā-e-qātil se alag

josh-e-vahshat meñ ba-rang-e-bū-e-gul āzād haiñ

us ke dīvāne rahe qaid-e-salāsil se alag

maiñ sitam-kash huuñ jahāñ meñ vo matā.a-e-nā-qubūl

barq bhī qismat se girtī hai to hāsil se alag

dekhnā kāfir butoñ kī shoḳhiyāñ bahr-e-ḳhudā

but-kade meñ chashm ke haiñ ka.aba-e-dil se alag

siina mujmir ġham sharar dil musht-e-ḳhas dam bād-e-tund

naala vo sho.ala ki ho ajzā-e-shāmil se alag

jam.a the ashk aañkh meñ mizhgāñ se phaile har taraf

mardum-e-kashtī-nashīñ hote haiñ sāhil se alag

lāzim-e-rū-e-munavvar hai tirā ḳhāl-e-siyāh

daaġh hotā hī nahīñ hai māh-e-kāmil se alag

allah allah imtiyāz-e-ijz-o-nāz-e-ishq-o-husn

sārbāñ kahtā hai majnūñ ko ki mahmil se alag

kisht se ḳhirman huā ḳhirman kā ye anjām hai

dāġh-e-barbādī uThāyā ranj-e-hāsil se alag

ittihād-e-zāt hai ma.anī magar idġhām-e-ishq

mil ga.e do dil to phir hote haiñ mushkil se alag

hijr-e-jānāñ meñ dimāġh-e-nāla-e-mauzūñ kahāñ

āshiyāñ apnā banā.eñge anādil se alag

be-ḳhudī dar-parda hai hangāma-sāz-e-anjuman

gosha-e-ḳhātir meñ haiñ vo ahl-e-mahfil se alag

maut hai goyā qadam rakhnā hai rāh-e-ishq meñ

ham-safar hone lage pahlī hī manzil se alag

ḳhvāb meñ bhī ham ko hai zauq-e-tamāshā-e-jamāl

dīda-e-bedār dil hai chashm-e-ġhāfil se alag

haif dard-e-saḳht-jānī vaa.e uzr-e-nāzukī

ho nahīñ saktā mirā sar dast-e-qātil se alag

ham ne dekhā rind-o-mast-e-be-ta.alluq hai 'zakī'

kufr-o-dīñ se be-ḳhabar haq aur bātil se alag

aate hain laKHt-e-jigar kaT kaT ke mushkil se alag

ju-e-KHun aankhon ko hoti hai rawan dil se alag

rakhiye kyon taswir-e-yar aaina-e-dil se alag

naqsh-e-hairat kab hua hai mah-e-kaamil se alag

jaan-e-pur-hasrat hui yun jism-e-bismil se alag

hath daman se juda sar pa-e-qatil se alag

josh-e-wahshat mein ba-rang-e-bu-e-gul aazad hain

us ke diwane rahe qaid-e-salasil se alag

main sitam-kash hun jahan mein wo mataa-e-na-qubul

barq bhi qismat se girti hai to hasil se alag

dekhna kafir buton ki shoKHiyan bahr-e-KHuda

but-kade mein chashm ke hain kaba-e-dil se alag

sina mujmir gham sharar dil musht-e-KHas dam baad-e-tund

nala wo shoala ki ho ajza-e-shamil se alag

jama the ashk aankh mein mizhgan se phaile har taraf

mardum-e-kashti-nashin hote hain sahil se alag

lazim-e-ru-e-munawwar hai tera KHal-e-siyah

dagh hota hi nahin hai mah-e-kaamil se alag

allah allah imtiyaz-e-ijz-o-naz-e-ishq-o-husn

sarban kahta hai majnun ko ki mahmil se alag

kisht se KHirman hua KHirman ka ye anjam hai

dagh-e-barbaadi uThaya ranj-e-hasil se alag

ittihad-e-zat hai mani magar idgham-e-ishq

mil gae do dil to phir hote hain mushkil se alag

hijr-e-jaanan mein dimagh-e-nala-e-mauzun kahan

aashiyan apna banaenge anadil se alag

be-KHudi dar-parda hai hangama-saz-e-anjuman

gosha-e-KHatir mein hain wo ahl-e-mahfil se alag

maut hai goya qadam rakhna hai rah-e-ishq mein

ham-safar hone lage pahli hi manzil se alag

KHwab mein bhi hum ko hai zauq-e-tamasha-e-jamal

dida-e-bedar dil hai chashm-e-ghafil se alag

haif dard-e-saKHt-jaani wae uzr-e-nazuki

ho nahin sakta mera sar dast-e-qatil se alag

hum ne dekha rind-o-mast-e-be-talluq hai 'zaki'

kufr-o-din se be-KHabar haq aur baatil se alag