ab kahan taKHmina-e-sud-o-ziyan rakhta hun main

ab kahāñ taḳhmīna-e-sūd-o-ziyāñ rakhtā huuñ maiñ

be-makāñ huuñ rasm-o-rāh-e-lā-makāñ rakhtā huuñ maiñ

ek jannat-zād āñkhoñ meñ samāyā thā kabhī

aaj tak palkoñ pe bār-e-kahkashāñ rakhtā huuñ maiñ

kyā kahā rakhtā huuñ maiñ ranjish yazīd-e-vaqt se

baat niklī hai to sun le aaj haañ rakhtā huuñ maiñ

jis taraf bhī jā.iye hai gūñgī āñkhoñ kā hujūm

be-sabab āñkhoñ ko ab ratb-ul-lisāñ rakhtā huuñ maiñ

'ishq meñ aur jang meñ jaa.ez hai sab ye soch kar

shahr ko us ke ta.iiñ kuchh bad-gumāñ rakhtā huuñ maiñ

kūcha kūcha aap se mansūb apnā kuchh nahīñ

kis qadar begāna shahr-e-jism-o-jāñ rakhtā huuñ meñ

guftugū meñ ho zabāñ miqrāz-ḳhū lāzim nahīñ

be-zabānī meñ bhī ik taur-e-bayāñ rakhtā huuñ maiñ

Thokaroñ kī chiiz thī duniyā magar hai tāj-e-sar

kis jagah rakhnā thā is ko aur kahāñ rakhtā huuñ maiñ

āsmāñ sar par uThā lenā hai majbūrī 'nazīr'

dastaras meñ bas zamīñ par āsmāñ rakhtā huuñ maiñ

ab kahan taKHmina-e-sud-o-ziyan rakhta hun main

be-makan hun rasm-o-rah-e-la-makan rakhta hun main

ek jannat-zad aankhon mein samaya tha kabhi

aaj tak palkon pe bar-e-kahkashan rakhta hun main

kya kaha rakhta hun main ranjish yazid-e-waqt se

baat nikli hai to sun le aaj han rakhta hun main

jis taraf bhi jaiye hai gungi aankhon ka hujum

be-sabab aankhon ko ab ratb-ul-lisan rakhta hun main

'ishq mein aur jang mein jaez hai sab ye soch kar

shahr ko us ke tain kuchh bad-guman rakhta hun main

kucha kucha aap se mansub apna kuchh nahin

kis qadar begana shahr-e-jism-o-jaan rakhta hun mein

guftugu mein ho zaban miqraaz-KHu lazim nahin

be-zabani mein bhi ek taur-e-bayan rakhta hun main

Thokaron ki chiz thi duniya magar hai taj-e-sar

kis jagah rakhna tha is ko aur kahan rakhta hun main

aasman sar par uTha lena hai majburi 'nazir'

dastaras mein bas zamin par aasman rakhta hun main