ada-e-nujum-o-qamar jaanta hun

adā-e-nujūm-o-qamar jāntā huuñ

mohabbat kī har rahguzar jāntā huuñ

nahīñ jāntā kaun rahbar hai merā

chalā jā rahā huuñ jidhar jāntā huuñ

rah-e-ishq-o-ulfat ko āsāñ na samjho

baḌī mushkiloñ kī Dagar jāntā huuñ

tamannā-e-dil ārzū-e-jigar ko

abas manzil-e-rahguzar jāntā huuñ

ye maanā ki gul-chīñ kī nazreñ haiñ mīThī

magar ḳhaar ab bāl-o-par jāntā huuñ

kabhī de diyā chāñdnī ne jo dhokā

hamesha maiñ shab ko sahar jāntā huuñ

na ab ham ko tarah-e-bahārāñ sunā tū

tirī bāġhbāñ har nazar jāntā huuñ

zamāne ke rangīñ talātum ko dekho

ki har sang-e-rah ko guhar jāntā huuñ

vo jām-e-mohabbat pilāyā jo tū ne

use zindagī kā samar jāntā huuñ

vahī husn kī bārgah terī ab bhī

kamī nūr-e-ahl-e-nazar jāntā huuñ

bulandī-e-ishq-o-mohabbat ki tujh ko

dil-o-jān o qalb-o-nazar jāntā huuñ

mirī āstīñ hī se nikleñge dushman

jinheñ aaj tak be-ḳhabar jāntā huuñ

nahīñ jānte mujh ko ab tak vo 'rahbar'

ki jin kī maiñ ik ik nazar jāntā huuñ

ada-e-nujum-o-qamar jaanta hun

mohabbat ki har rahguzar jaanta hun

nahin jaanta kaun rahbar hai mera

chala ja raha hun jidhar jaanta hun

rah-e-ishq-o-ulfat ko aasan na samjho

baDi mushkilon ki Dagar jaanta hun

tamanna-e-dil aarzu-e-jigar ko

abas manzil-e-rahguzar jaanta hun

ye mana ki gul-chin ki nazren hain miThi

magar KHar ab baal-o-par jaanta hun

kabhi de diya chandni ne jo dhoka

hamesha main shab ko sahar jaanta hun

na ab hum ko tarah-e-bahaaran suna tu

teri baghban har nazar jaanta hun

zamane ke rangin talatum ko dekho

ki har sang-e-rah ko guhar jaanta hun

wo jam-e-mohabbat pilaya jo tu ne

use zindagi ka samar jaanta hun

wahi husn ki bargah teri ab bhi

kami nur-e-ahl-e-nazar jaanta hun

bulandi-e-ishq-o-mohabbat ki tujh ko

dil-o-jaan o qalb-o-nazar jaanta hun

meri aastin hi se niklenge dushman

jinhen aaj tak be-KHabar jaanta hun

nahin jaante mujh ko ab tak wo 'rahbar'

ki jin ki main ek ek nazar jaanta hun