agarche aaj bhi zinda hain lekin kal mein rahna hai

agarche aaj bhī zinda haiñ lekin kal meñ rahnā hai

musalsal irtiqā ke dasta-e-avval meñ rahnā hai

abhī ham saañs lene ke bahāne saañs rokeñge

kashākash aur kashish ke āhanī chungal meñ rahnā hai

ye dil hai ki gul-e-nāzuk ajab hai is kā mustaqbil

use angār ban ke dard kī minqal meñ rahnā hai

huī thī barf-bārī to vahāñ koh-e-girāñ ham the

isī baa.is to ab sulge hue jangal meñ rahnā hai

havā meñ ḳhvāhish-e-pardāz ne bhī par nikāle haiñ

zamīn-e-rizq hai mujh ko isī daldal meñ rahnā hai

shikāyat kā mahal kyā hai maqām-e-rahm hai ye to

mire qātil ko ā.inda isī maqtal meñ rahnā hai

tumhārī yaad kā sāvan barastā hai barasne do

ki Dūbūñ yā tirūñ mujh ko isī jal-thal meñ rahnā hai

ibārat meñ maqām-o-martaba to baa'd kī shai hai

abhī qirtās par mauhūm se jadval meñ rahnā hai

hamesha 'sa.adiya' ko mausamoñ kā saath denā hai

kabhī khaddar pahannā hai kabhī maḳhmal meñ rahnā hai

agarche aaj bhi zinda hain lekin kal mein rahna hai

musalsal irtiqa ke dasta-e-awwal mein rahna hai

abhi hum sans lene ke bahane sans rokenge

kashakash aur kashish ke aahani chungal mein rahna hai

ye dil hai ki gul-e-nazuk ajab hai is ka mustaqbil

use angar ban ke dard ki minqal mein rahna hai

hui thi barf-bari to wahan koh-e-giran hum the

isi bais to ab sulge hue jangal mein rahna hai

hawa mein KHwahish-e-pardaz ne bhi par nikale hain

zamin-e-rizq hai mujh ko isi daldal mein rahna hai

shikayat ka mahal kya hai maqam-e-rahm hai ye to

mere qatil ko aainda isi maqtal mein rahna hai

tumhaari yaad ka sawan barasta hai barasne do

ki Dubun ya tirun mujh ko isi jal-thal mein rahna hai

ibarat mein maqam-o-martaba to ba'd ki shai hai

abhi qirtas par mauhum se jadwal mein rahna hai

hamesha 'sadiya' ko mausamon ka sath dena hai

kabhi khaddar pahanna hai kabhi maKHmal mein rahna hai