agarche qatra hun aur bahr se juda bhi nahin

agarche qatra huuñ aur bahr se judā bhī nahīñ

magar ye kyā hai ki maiñ bahr-āshnā bhī nahīñ

ye justujū tirī laa.ī hai kis jagah mujh ko

yahāñ to koī tirā sūrat-āshnā bhī nahīñ

dikhā kuchh apnī ziyā tū hī dāġh-e-nākāmī

ki ab to jalva-e-ummīd kā patā bhī nahīñ

ilāhī kis kā sahārā vufūr-e-zof meñ luuñ

laboñ pe ab to mire āh-e-nā-rasā bhī nahīñ

vo ek tum ki mire mudda.ā-e-sar-tā-pā

vo ek maiñ ki jise izn-e-iltijā bhī nahīñ

na kārvāñ kā pata hai na rah-ravāñ kā nishāñ

ajab hai rāh-e-adam jis meñ naqsh-e-pā bhī nahīñ

ḳhayāl-e-yār hī ḳhizr-e-rah-e-mohabbat hai

na chhūT jaa.e to phir koī rahnumā bhī nahīñ

urūs-e-dahr dikhātī hai kyoñ jamāl mujhe

mire junūñ ko to is but se vāsta bhī nahīñ

agarche qatra hun aur bahr se juda bhi nahin

magar ye kya hai ki main bahr-ashna bhi nahin

ye justuju teri lai hai kis jagah mujh ko

yahan to koi tera surat-ashna bhi nahin

dikha kuchh apni ziya tu hi dagh-e-nakaami

ki ab to jalwa-e-ummid ka pata bhi nahin

ilahi kis ka sahaara wufur-e-zof mein lun

labon pe ab to mere aah-e-na-rasa bhi nahin

wo ek tum ki mere muddaa-e-sar-ta-pa

wo ek main ki jise izn-e-iltija bhi nahin

na karwan ka pata hai na rah-rawan ka nishan

ajab hai rah-e-adam jis mein naqsh-e-pa bhi nahin

KHayal-e-yar hi KHizr-e-rah-e-mohabbat hai

na chhuT jae to phir koi rahnuma bhi nahin

urus-e-dahr dikhati hai kyon jamal mujhe

mere junun ko to is but se wasta bhi nahin