ahl-e-haq ki baaton se jo nazar churaega

ahl-e-haq kī bātoñ se jo nazar churā.egā

vaqt ek din us ko aa.ina dikhā.egā

jism kā har ik hissa ḳhushbueñ bikheregā

lams merī sāñsoñ kā jab asar dikhā.egā

fasl-e-gul kī aamad hai chaak hoñge phir dāman

phir junūñ kī vaadī kā rāsta bulā.egā

ḳhūn-e-ārzū apnā nazr-e-gulsitāñ kar do

tab guloñ ke chehre par kuchh nikhār aa.egā

eqtidār-o-mansab kī jang roz jaarī hai

kaun qadr-e-insāñ kī fasl ab ugā.egā

harakat-o-amal meñ haiñ kāmrāniyāñ muzmar

manzileñ usī kī haiñ jo qadam baḌhā.egā

tum bhī Duub jāoge ḳhush-gavār yādoñ meñ

jab kabhī ġhazal merī koī gungunā.egā

hai 'nadīm' kuchh aisī dāstān-e-dil apnī

sun ke husn ro.egā ishq muskurā.egā

ahl-e-haq ki baaton se jo nazar churaega

waqt ek din us ko aaina dikhaega

jism ka har ek hissa KHushbuen bikherega

lams meri sanson ka jab asar dikhaega

fasl-e-gul ki aamad hai chaak honge phir daman

phir junun ki wadi ka rasta bulaega

KHun-e-arzu apna nazr-e-gulsitan kar do

tab gulon ke chehre par kuchh nikhaar aaega

eqtidar-o-mansab ki jang roz jari hai

kaun qadr-e-insan ki fasl ab ugaega

harakat-o-amal mein hain kaamraniyan muzmar

manzilen usi ki hain jo qadam baDhaega

tum bhi Dub jaoge KHush-gawar yaadon mein

jab kabhi ghazal meri koi gungunaega

hai 'nadim' kuchh aisi dastan-e-dil apni

sun ke husn roega ishq muskuraega