ai barq-e-tajalli fikr hai ye kya tera bharam rakh paungi

ai barq-e-tajallī fikr hai ye kyā terā bharam rakh pā.ūñgī

mushtāq to hai dil jalvoñ kā āñkheñ vo kahāñ se lā.ūñgī

ushshāq kī mahfil ḳhuub magar kyā kaam mirā jab tū hī nahīñ

dāman ko sameTūñgī apne ḳhāmoshī se uTh jā.ūñgī

dekho to shikan peshānī kī ehsās karo to uljhan kā

ḳham aa bhī ga.e kākul meñ agar kaahe ko inheñ suljhā.ūñgī

sab husn ke āshiq haiñ tere kāfir kā bhī tū vaa.iz kā bhī tū

bas ab ye batā ai harjā.ī kyā maiñ hī terā ġham khā.ūñgī

bas thoḌī sī bārish husn-e-azal tūfāñ kī zarūrat hai hī nahīñ

patthar to nahīñ ki bah na sakūñ ḳhāshāk huuñ maiñ bah jā.ūñgī

ik ālam-e-jazb-o-mastī hai mat pūchh tamanna 'kausar' kī

kuchh aur zarā baḌh jaa.e junūñ har taur tirī ho jā.ūñgī

ai barq-e-tajalli fikr hai ye kya tera bharam rakh paungi

mushtaq to hai dil jalwon ka aankhen wo kahan se laungi

ushshaq ki mahfil KHub magar kya kaam mera jab tu hi nahin

daman ko sameTungi apne KHamoshi se uTh jaungi

dekho to shikan peshani ki ehsas karo to uljhan ka

KHam aa bhi gae kakul mein agar kahe ko inhen suljhaungi

sab husn ke aashiq hain tere kafir ka bhi tu waiz ka bhi tu

bas ab ye bata ai harjai kya main hi tera gham khaungi

bas thoDi si barish husn-e-azal tufan ki zarurat hai hi nahin

patthar to nahin ki bah na sakun KHashak hun main bah jaungi

ek aalam-e-jazb-o-masti hai mat puchh tamanna 'kausar' ki

kuchh aur zara baDh jae junun har taur teri ho jaungi