ai mazaq-e-justuju-e-dost tu le chal kahin

ai mazāq-e-justujū-e-dost tū le chal kahīñ

ye zamīñ ho yā na ho ye āsmāñ ho yā na ho

sar jhukā.e merī bālīñ se uThā hai chārāgar

ab vo merī iltijā par mehrbāñ ho yā na ho

qissa-e-uftād-e-ġham kah kar subuk-sar kyoñ banūñ

vo mire hāl-e-zabūñ par mehrbāñ ho yā na ho

piine vaale pī magar Thukrā ke pī har qaid-o-band

mai-kada ho yā na ho pīr-e-muġhāñ ho yā na ho

āñsuoñ se dil zarā halkā to ho jaatā hai dost

kyā ḳhabar yuuñ chāra-e-dard-e-nihāñ ho yā na ho

tāqat-e-parvāz hotī jā rahī hai garm-kār

ab chaman ho yā na ho ab āshiyāñ ho yā na ho

chashm-e-dushman meñ hai is bedār-qismat kā maqām

dostoñ ke lab pe merī dāstāñ ho yā na ho

zamzama-pardāz shā'ir chāhiye ab bazm meñ

ahl-e-fan ho yā na ho ahl-e-zabāñ ho yā na ho

ai mazaq-e-justuju-e-dost tu le chal kahin

ye zamin ho ya na ho ye aasman ho ya na ho

sar jhukae meri baalin se uTha hai chaaragar

ab wo meri iltija par mehrban ho ya na ho

qissa-e-uftad-e-gham kah kar subuk-sar kyon banun

wo mere haal-e-zabun par mehrban ho ya na ho

pine wale pi magar Thukra ke pi har qaid-o-band

mai-kada ho ya na ho pir-e-mughan ho ya na ho

aansuon se dil zara halka to ho jata hai dost

kya KHabar yun chaara-e-dard-e-nihan ho ya na ho

taqat-e-parwaz hoti ja rahi hai garm-kar

ab chaman ho ya na ho ab aashiyan ho ya na ho

chashm-e-dushman mein hai is bedar-qismat ka maqam

doston ke lab pe meri dastan ho ya na ho

zamzama-pardaz sha'ir chahiye ab bazm mein

ahl-e-fan ho ya na ho ahl-e-zaban ho ya na ho