aisa manzar to kabhi dekha na tha

aisā manzar to kabhī dekhā na thā

raushnī meñ bhī mirā saaya na thā

pyaar ke bādal to guzre the magar

dil ke sahrā meñ koī barsā na thā

umr-bhar paḌhtā rahā aisā bhī ḳhat

tū ne mere naam jo likkhā na thā

jism kī dīvār ik thī darmiyāñ

maiñ ne pā kar bhī tujhe paayā na thā

yuuñ to shabnam thā magar ai dosto

maiñ kisī bhī phuul par bikhrā na thā

maut siine se lagā lene ko hai

zindagī ne haal tak pūchhā na thā

ik hujūm-e-mah-vashāñ thā bazm meñ

bas vahī ik chāñd kā TukḌā na thā

aisa manzar to kabhi dekha na tha

raushni mein bhi mera saya na tha

pyar ke baadal to guzre the magar

dil ke sahra mein koi barsa na tha

umr-bhar paDhta raha aisa bhi KHat

tu ne mere nam jo likkha na tha

jism ki diwar ek thi darmiyan

main ne pa kar bhi tujhe paya na tha

yun to shabnam tha magar ai dosto

main kisi bhi phul par bikhra na tha

maut sine se laga lene ko hai

zindagi ne haal tak puchha na tha

ek hujum-e-mah-washan tha bazm mein

bas wahi ek chand ka TukDa na tha