apna nafas nafas hai ki shoala kahen jise

apnā nafas nafas hai ki sho.ala kaheñ jise

vo zindagī hai aag kā dariyā kaheñ jise

har-chand shahr shahr hai jashn-e-sahar magar

vo raushnī kahāñ hai saverā kaheñ jise

vo rañg-e-fasl-e-gul hai ki patjhaḌ bhī maat khaa.e

vo sūrat-e-chaman hai ki sahrā kahīñ jise

jo chāragar the vo bhī hue qātil-e-hayāt

ab kaun hai ki apnā masīhā kaheñ jise

dīvār-o-dar pe sabt haiñ naqsh-o-nigār-e-yār

apnā makān hai ki ajantā kaheñ jise

is tarah tābnāk hai vo sajda-gāh-e-shauq

jān-e-haram ki jān-e-kalīsā kaheñ jise

'vāhid' tumheñ jo ḳhvāhish-e-nām-o-numūd ho

vo shā.irī karo ki muamma kaheñ jise

apna nafas nafas hai ki shoala kahen jise

wo zindagi hai aag ka dariya kahen jise

har-chand shahr shahr hai jashn-e-sahar magar

wo raushni kahan hai sawera kahen jise

wo rang-e-fasl-e-gul hai ki patjhaD bhi mat khae

wo surat-e-chaman hai ki sahra kahin jise

jo chaaragar the wo bhi hue qatil-e-hayat

ab kaun hai ki apna masiha kahen jise

diwar-o-dar pe sabt hain naqsh-o-nigar-e-yar

apna makan hai ki ajanta kahen jise

is tarah tabnak hai wo sajda-gah-e-shauq

jaan-e-haram ki jaan-e-kalisa kahen jise

'wahid' tumhein jo KHwahish-e-nam-o-numud ho

wo shairi karo ki muamma kahen jise