apni guftar ka jadu kabhi chalta dekhun

apnī guftār kā jaadū kabhī chaltā dekhūñ

us ke inkār ko iqrār meñ Dhaltā dekhūñ

us kā aanā hai qayāmat to qayāmat hī sahī

aaj ḳhurshīd ko maġhrib se nikaltā dekhūñ

is se pahle mirī āñkhoñ kī basārat chhin jaa.e

kisī dushman ko bhī maiñ aag meñ jaltā dekhūñ

kaash aisī bhī koī iid mire ghar aa.e

apne bachchoñ ko masarrat se uchhaltā dekhūñ

ek pal ke liye mujh se bhī muḳhātib ho jā

maiñ bhī is dil ko zarā der bahaltā dekhūñ

merī āġhosh-e-mohabbat meñ kabhī tū aa.e

garmī-e-shauq se maiñ tujh ko pighaltā dekhūñ

ma.arifat ke liye kaafī hai mirā apnā vajūd

kyā zarūrī hai ki hangāma-e-duniyā dekhūñ

dard-e-dil is liye ḳhāmosh sahe jaatā huuñ

ye gavārā nahīñ mujh ko tujhe rusvā dekhūñ

shahr-e-āzar meñ karūñ ā.ina-sāzī jo 'nadīm'

apnā chehra ka.ī chehroñ meñ badaltā dekhūñ

apni guftar ka jadu kabhi chalta dekhun

us ke inkar ko iqrar mein Dhalta dekhun

us ka aana hai qayamat to qayamat hi sahi

aaj KHurshid ko maghrib se nikalta dekhun

is se pahle meri aankhon ki basarat chhin jae

kisi dushman ko bhi main aag mein jalta dekhun

kash aisi bhi koi id mere ghar aae

apne bachchon ko masarrat se uchhalta dekhun

ek pal ke liye mujh se bhi muKHatib ho ja

main bhi is dil ko zara der bahalta dekhun

meri aaghosh-e-mohabbat mein kabhi tu aae

garmi-e-shauq se main tujh ko pighalta dekhun

marifat ke liye kafi hai mera apna wajud

kya zaruri hai ki hangama-e-duniya dekhun

dard-e-dil is liye KHamosh sahe jata hun

ye gawara nahin mujh ko tujhe ruswa dekhun

shahr-e-azar mein karun aaina-sazi jo 'nadim'

apna chehra kai chehron mein badalta dekhun