baat kya hai wo tajalli ba-sar-e-tur nahin

baat kyā hai vo tajallī ba-sar-e-tūr nahīñ

ishq majbūr sahī husn to majbūr nahīñ

jis meñ marzī ho tirī apnī razā bhī hai vahī

ḳhud-parastī ho mohabbat kā ye dastūr nahīñ

nigah-e-chashm-e-karam kār-e-rafū kartī hai

yaañ durustī dil-e-sad-chāk kī manzūr nahīñ

ab kise sāġhar-e-mai aa ke pilā.e saaqī

nazr-e-sar dene ko sarmad nahīñ mansūr nahīñ

pās-e-sayyād ne rokā hai ba-mushkil varna

tan hai pāband-e-qafas naala to majbūr nahīñ

qahr se tere ziyāda hai ināyat terī

baḳhsh de 'nūr' ko rahmat se ye kuchh duur nahīñ

baat kya hai wo tajalli ba-sar-e-tur nahin

ishq majbur sahi husn to majbur nahin

jis mein marzi ho teri apni raza bhi hai wahi

KHud-parasti ho mohabbat ka ye dastur nahin

nigah-e-chashm-e-karam kar-e-rafu karti hai

yan durusti dil-e-sad-chaak ki manzur nahin

ab kise saghar-e-mai aa ke pilae saqi

nazr-e-sar dene ko sarmad nahin mansur nahin

pas-e-sayyaad ne roka hai ba-mushkil warna

tan hai paband-e-qafas nala to majbur nahin

qahr se tere ziyaada hai inayat teri

baKHsh de 'nur' ko rahmat se ye kuchh dur nahin