badan mein zahr tha ya iztirab tha kya tha

badan meñ zahr thā yā iztirāb thā kyā thā

ye zindagī meñ musalsal azaab thā kyā thā

samā.atoñ se badan tak thā chhalnī chhalnī tamām

kisī kā lahja thā yā āftāb thā kyā thā

vo jis kī diid se āñkheñ hamārī ḳhīra huiiñ

kisī kā husn thā yā māhtāb thā kyā thā

maiñ bhāgtā hī rahā tishnagī bujhī na mirī

ye merā vahm thā yā phir sarāb thā kyā thā

girā gayā hai jo shādāb sabz peḌoñ ko

vo zalzala thā ki koī azaab thā kyā thā

jo merī chashm-e-falak par kabhī Thahar na sakā

sahāb thā ki hasīñ ek ḳhvāb thā kyā thā

maiñ apne aap ko hal kar sakā na āḳhir tak

mirā vajūd muamma thā ḳhvāb thā kyā thā

fasād phuuT paḌā shahr meñ mire 'naqvī'

sitam thā qahr thā yaum-ul-hisāb thā kyā thā

badan mein zahr tha ya iztirab tha kya tha

ye zindagi mein musalsal azab tha kya tha

samaaton se badan tak tha chhalni chhalni tamam

kisi ka lahja tha ya aaftab tha kya tha

wo jis ki did se aankhen hamari KHira huin

kisi ka husn tha ya mahtab tha kya tha

main bhagta hi raha tishnagi bujhi na meri

ye mera wahm tha ya phir sarab tha kya tha

gira gaya hai jo shadab sabz peDon ko

wo zalzala tha ki koi azab tha kya tha

jo meri chashm-e-falak par kabhi Thahar na saka

sahab tha ki hasin ek KHwab tha kya tha

main apne aap ko hal kar saka na aaKHir tak

mera wajud muamma tha KHwab tha kya tha

fasad phuT paDa shahr mein mere 'naqwi'

sitam tha qahr tha yaum-ul-hisab tha kya tha