bahut latif hai ye muKHtasar jahan apna

bahut latīf hai ye muḳhtasar jahāñ apnā

jigar-navāz bhī tū tū hī rāzdāñ apnā

tamām daulat-e-hastī luTā ke māñgūñgā

bahār-e-husn tirī zauq-e-jāvedāñ apnā

baham hue haiñ shanāsā-e-yak-digar donoñ

nigāh-e-nāz tirī qalb-e-ḳhūñ-chakāñ apnā

shafaq meñ sīna-e-gul meñ junūñ kī vaadī meñ

baTā hai ḳhūn-e-jigar bhī kahāñ kahāñ apnā

ye aarzī hī sahī āb-o-rang-e-husn magar

luTā rahī hai ḳhirad in pe kārvāñ apnā

jabīñ-navāz hai jalvoñ kī ye farāvānī

kahāñ hai aaj sar-e-nang-e-āstāñ apnā

navāzishāt-e-guzishta ki ab ḳhayālī haiñ

banā rahā huuñ unhīñ se maiñ gulistāñ apnā

ajiib zauq-fazā justujū kī lazzat hai

bhaTakne do bhī zarā der kārvāñ apnā

hazār kuchh na sahī musht-e-ḳhāk-e-insāñ meñ

urūj-e-arsh pe hai phir bhī āstāñ apnā

na suud hī na ziyāñ hī na ranj-o-rāhat hai

hai aql-o-hosh ke parde meñ imtihāñ apnā

haiñ āshnā-e-havādis to ḳhauf-e-barq hī kyā

dikhā dikhā ke banāte haiñ āshiyāñ apnā

bahut latif hai ye muKHtasar jahan apna

jigar-nawaz bhi tu tu hi raazdan apna

tamam daulat-e-hasti luTa ke mangunga

bahaar-e-husn teri zauq-e-jawedan apna

baham hue hain shanasa-e-yak-digar donon

nigah-e-naz teri qalb-e-KHun-chakan apna

shafaq mein sina-e-gul mein junun ki wadi mein

baTa hai KHun-e-jigar bhi kahan kahan apna

ye aarzi hi sahi aab-o-rang-e-husn magar

luTa rahi hai KHirad in pe karwan apna

jabin-nawaz hai jalwon ki ye farawani

kahan hai aaj sar-e-nang-e-astan apna

nawazishat-e-guzishta ki ab KHayali hain

bana raha hun unhin se main gulistan apna

ajib zauq-faza justuju ki lazzat hai

bhaTakne do bhi zara der karwan apna

hazar kuchh na sahi musht-e-KHak-e-insan mein

uruj-e-arsh pe hai phir bhi aastan apna

na sud hi na ziyan hi na ranj-o-rahat hai

hai aql-o-hosh ke parde mein imtihan apna

hain aashna-e-hawadis to KHauf-e-barq hi kya

dikha dikha ke banate hain aashiyan apna