bashar ko mashal-e-iman se aagahi na mili

bashar ko mash.al-e-īmāñ se āgahī na milī

dhuāñ vo thā ki nigāhoñ ko raushnī na milī

ḳhushī kī ma.arifat aur ġham kī āgahī na milī

jise jahāñ meñ mohabbat kī zindagī na milī

jigar na thā ki koī phāñs sī chubhī na milī

jahāñ kī ḳhaak uḌaa.ī kahīñ ḳhushī na milī

ye kah ke āḳhir-e-shab sham' ho ga.ī ḳhāmosh

kisī kī zindagī lene se zindagī na milī

laboñ pe phail ga.ī ek mauj-e-ġham aksar

bichhaḌ ke tujh se hañsī kī tarah hañsī na milī

tavāf-e-sham.a patañgoñ kā jal ke bhī hai vahī

jigar kī aag se āñkhoñ ko raushnī na milī

sabāt pā na sakegā koī nizām-e-chaman

fasurda ġhunchoñ ko jis meñ shaguftagī na milī

falak ke tāroñ se kyā duur hogī zulmat-e-shab

jab apne ghar ke charāġhoñ se raushnī na milī

abhī shabāb hai kar luuñ ḳhatā.eñ jī bhar ke

phir is maqām pe umr-e-ravāñ milī na milī

vo qāfile ki falak jin ke paañv kā thā ġhubār

rah-e-hayāt se bhaTke to gard bhī na milī

vo tīra-baḳht haqīqat meñ hai jise 'mullā'

kisī nigāh ke saa.e kī chāñdnī na milī

bashar ko mashal-e-iman se aagahi na mili

dhuan wo tha ki nigahon ko raushni na mili

KHushi ki marifat aur gham ki aagahi na mili

jise jahan mein mohabbat ki zindagi na mili

jigar na tha ki koi phans si chubhi na mili

jahan ki KHak uDai kahin KHushi na mili

ye kah ke aaKHir-e-shab sham' ho gai KHamosh

kisi ki zindagi lene se zindagi na mili

labon pe phail gai ek mauj-e-gham aksar

bichhaD ke tujh se hansi ki tarah hansi na mili

tawaf-e-shama patangon ka jal ke bhi hai wahi

jigar ki aag se aankhon ko raushni na mili

sabaat pa na sakega koi nizam-e-chaman

fasurda ghunchon ko jis mein shaguftagi na mili

falak ke taron se kya dur hogi zulmat-e-shab

jab apne ghar ke charaghon se raushni na mili

abhi shabab hai kar lun KHataen ji bhar ke

phir is maqam pe umr-e-rawan mili na mili

wo qafile ki falak jin ke panw ka tha ghubar

rah-e-hayat se bhaTke to gard bhi na mili

wo tira-baKHt haqiqat mein hai jise 'mulla'

kisi nigah ke sae ki chandni na mili