be-laus ho jo aisa bashar DhunD rahe hain

be-laus ho jo aisā bashar DhūñD rahe haiñ

goyā ki vo sahrā meñ shajar DhūñD rahe haiñ

ham ahl-e-junūñ dard-e-mohabbat ke haiñ ḳhūgar

marham kī tarah zaḳhm-e-jigar DhūñD rahe haiñ

iḳhlās-o-mohabbat ke shajar kāTne vaale

kyoñ mehr-o-muravvat ke samar DhūñD rahe haiñ

vo jin ke liye tishna thiiñ be-ḳhvāb nigāheñ

ḳhud aaj mirī pyāsī nazar DhūñD rahe haiñ

karte nahīñ sailāb-e-masā.il kā mudāvā

aḳhbār sabhī taaza ḳhabar DhūñD rahe haiñ

patthar ke makīñ rahte haiñ patthar ke nagar meñ

sīnoñ meñ kyoñ ham un ke sharar DhūñD rahe haiñ

duniyā kī tabāhī pe kahāñ apnī nazar hai

ham roz na.e ilm hunar DhūñD rahe haiñ

sarkash bhī munāfiq bhī haiñ karte nahīñ tauba

'shāmā' vo duāoñ meñ asar DhūñD rahe haiñ

be-laus ho jo aisa bashar DhunD rahe hain

goya ki wo sahra mein shajar DhunD rahe hain

hum ahl-e-junun dard-e-mohabbat ke hain KHugar

marham ki tarah zaKHm-e-jigar DhunD rahe hain

iKHlas-o-mohabbat ke shajar kaTne wale

kyon mehr-o-murawwat ke samar DhunD rahe hain

wo jin ke liye tishna thin be-KHwab nigahen

KHud aaj meri pyasi nazar DhunD rahe hain

karte nahin sailab-e-masail ka mudawa

aKHbar sabhi taza KHabar DhunD rahe hain

patthar ke makin rahte hain patthar ke nagar mein

sinon mein kyon hum un ke sharar DhunD rahe hain

duniya ki tabahi pe kahan apni nazar hai

hum roz nae ilm hunar DhunD rahe hain

sarkash bhi munafiq bhi hain karte nahin tauba

'shama' wo duaon mein asar DhunD rahe hain