bhanwar se naw ke palDe bachane paDte hain

bhañvar se naav ke palḌe bachāne paḌte haiñ

mujhe ye log kināre lagāne paḌte haiñ

so itnā sahl mohabbat ko le na shahzādī

gudāz poroñ se kāñTe uThāne paḌte haiñ

kabhī jo haal ko chehre se bhāñp letā thā

ab us ko rañj bhī ro kar batāne paḌte haiñ

hamārī shāḳhoñ tak aatī hai jab ḳhizāñ kī shunīd

ham aise peḌoñ ko patte girāne paḌte haiñ

tapish bhī dhuup kī lagne na dī ho jin ko kabhī

vo pyāre miTTī meñ ik din dabāne paḌte haiñ

vo shaḳhs merī 'hasan' ek bhī nahīñ suntā

maiñ kyā karūñ mujhe aañsū bahāne paḌte haiñ

bhanwar se naw ke palDe bachane paDte hain

mujhe ye log kinare lagane paDte hain

so itna sahl mohabbat ko le na shahzadi

gudaz poron se kanTe uThane paDte hain

kabhi jo haal ko chehre se bhanp leta tha

ab us ko ranj bhi ro kar batane paDte hain

hamari shaKHon tak aati hai jab KHizan ki shunid

hum aise peDon ko patte girane paDte hain

tapish bhi dhup ki lagne na di ho jin ko kabhi

wo pyare miTTi mein ek din dabane paDte hain

wo shaKHs meri 'hasan' ek bhi nahin sunta

main kya karun mujhe aansu bahane paDte hain