burai ko burai fan ko fan kahna hi paDta hai

burā.ī ko burā.ī fan ko fan kahnā hī paḌtā hai

jo haq hai vo sar-e-dār-o-rasan kahnā hī paḌtā hai

kabhī pūchhī na ahl-e-anjuman kī baat bhī tum ne

tumheñ is par bhī rūh-e-anjuman kahnā hī paḌtā hai

nazar aatī hai apnī pārsā.ī shaiḳh ko isyāñ

tirī añgḌā.ī ko tauba-shikan kahnā hī paḌtā hai

shikār-e-sard-mehrī-e-vatan huuñ ye to bar-haq hai

magar apne vatan ko to vatan kahnā hī paḌtā hai

jinheñ apnā kabhī kahte the ham un ko hī begāna

ba-faiz-e-gardish-e-charḳh-e-kuhan kahnā hī paḌtā hai

surūr-e-bāda-e-hastī ko is daur-e-tabāhī meñ

shahīd-e-talḳhī-e-kām-o-dahan kahnā hī paḌtā hai

balā se rahbarān-e-asr mujh ko be-adab samjheñ

mujhe har rāhzan ko rāhzan kahnā hī paḌtā hai

kahīñ soz-e-ġham-e-pinhāñ se zanjīreñ pighaltī haiñ

use dīvānoñ kā dīvāna-pan kahnā hī paḌtā hai

ḳhizāñ kā laal ho yā fasl-e-gul kī god kā paalā

chaman ko to bahar-sūrat chaman kahnā hī paḌtā hai

ujāle zulmatoñ kī laash par taḳhlīq hote haiñ

sahar ko shab kī mayyat kā kafan kahnā hī paḌtā hai

jahāñ taḳhlīq par pābandiyāñ hoñ fikr par pahre

use dār-o-rasan kī anjuman kahnā hī paḌtā hai

ḳhafā haiñ hosh-mandān-e-jahāñ par josh-e-vahshat meñ

jo aa jaatā hai lab par ai 'hasan' kahnā hī paḌtā hai

burai ko burai fan ko fan kahna hi paDta hai

jo haq hai wo sar-e-dar-o-rasan kahna hi paDta hai

kabhi puchhi na ahl-e-anjuman ki baat bhi tum ne

tumhein is par bhi ruh-e-anjuman kahna hi paDta hai

nazar aati hai apni parsai shaiKH ko isyan

teri angDai ko tauba-shikan kahna hi paDta hai

shikar-e-sard-mehri-e-watan hun ye to bar-haq hai

magar apne watan ko to watan kahna hi paDta hai

jinhen apna kabhi kahte the hum un ko hi begana

ba-faiz-e-gardish-e-charKH-e-kuhan kahna hi paDta hai

surur-e-baada-e-hasti ko is daur-e-tabahi mein

shahid-e-talKHi-e-kaam-o-dahan kahna hi paDta hai

bala se rahbaran-e-asr mujh ko be-adab samjhen

mujhe har rahzan ko rahzan kahna hi paDta hai

kahin soz-e-gham-e-pinhan se zanjiren pighalti hain

use diwanon ka diwana-pan kahna hi paDta hai

KHizan ka lal ho ya fasl-e-gul ki god ka pala

chaman ko to bahar-surat chaman kahna hi paDta hai

ujale zulmaton ki lash par taKHliq hote hain

sahar ko shab ki mayyat ka kafan kahna hi paDta hai

jahan taKHliq par pabandiyan hon fikr par pahre

use dar-o-rasan ki anjuman kahna hi paDta hai

KHafa hain hosh-mandan-e-jahan par josh-e-wahshat mein

jo aa jata hai lab par ai 'hasan' kahna hi paDta hai