chand ke ruKH pe jo zaKHmon ka na ghaza hota

chāñd ke ruḳh pe jo zaḳhmoñ kā na ġhāza hotā

phir to vo chāñd na hotā koī shīsha hotā

kam se kam log to ruk kar zarā paḌhte mujh ko

kaash maiñ bhī kisī dīvār kā katba hotā

jis taraf dekhiye patthar hī se chehre haiñ yahāñ

phuul se lab na sahī phuul sā lahja hotā

jaane kin sahme hue ḳhvāboñ kā bantā madfan

apne is daur meñ gar maiñ koī naġhma hotā

bas yahī ek ḳhalish dil meñ sisaktī hai sadā

tū mirā jism kabhī maiñ tirā saaya hotā

itnī tasvīreñ sajā rakkhī haiñ tū ne dil meñ

tere album meñ mirā bhī koī chehra hotā

yuuñ sitāre na kabhī shaam se chīḳhā karte

sīna-e-shab meñ agar sub.h kā naqsha hotā

shahr meñ kitne safīrān-e-junūñ aa.e haiñ

in ke e.azāz meñ 'at.har' koī jalsa hotā

chand ke ruKH pe jo zaKHmon ka na ghaza hota

phir to wo chand na hota koi shisha hota

kam se kam log to ruk kar zara paDhte mujh ko

kash main bhi kisi diwar ka katba hota

jis taraf dekhiye patthar hi se chehre hain yahan

phul se lab na sahi phul sa lahja hota

jaane kin sahme hue KHwabon ka banta madfan

apne is daur mein gar main koi naghma hota

bas yahi ek KHalish dil mein sisakti hai sada

tu mera jism kabhi main tera saya hota

itni taswiren saja rakkhi hain tu ne dil mein

tere album mein mera bhi koi chehra hota

yun sitare na kabhi sham se chiKHa karte

sina-e-shab mein agar subh ka naqsha hota

shahr mein kitne safiran-e-junun aae hain

in ke eazaz mein 'athar' koi jalsa hota