chaman kal tha jo sahra ho gaya hai

chaman kal thā jo sahrā ho gayā hai

ajab rūhoñ kā Derā ho gayā hai

tamāshā sab nazar kā ho chukā bas

badan kā rang gahrā ho gayā hai

vo aahaT aaj kaisī be-sadā hai

ye mujh meñ kaun bahrā ho gayā hai

ye dariyā saarā patthar ban chukā hai

yā ye ehsās gahrā ho gayā hai

parinda ḳhuuñ se tar āñkhoñ meñ uḌtā

safar apnā sunahrā ho gayā hai

maiñ jin saḌkoñ par aksar ghūmtā thā

vahāñ par aaj pahrā ho gayā hai

vo merā haath thāme kah rahā hai

chalo ghar ab añdherā ho gayā hai

bas ik āvāz ghar meñ gūñjtī hai

zarā so le saverā ho gayā hai

sunegā kyā sitāroñ kī sadā.eñ

mirā ākāsh bahrā ho gayā hai

bichhaḌ kar ḳhud se maiñ rotā thā pahroñ

ye sadma bhī ikahrā ho gayā hai

maiñ us ke ġham meñ 'ajmal' Dūbtā kyā

samundar aur gahrā ho gayā he

chaman kal tha jo sahra ho gaya hai

ajab ruhon ka Dera ho gaya hai

tamasha sab nazar ka ho chuka bas

badan ka rang gahra ho gaya hai

wo aahaT aaj kaisi be-sada hai

ye mujh mein kaun bahra ho gaya hai

ye dariya sara patthar ban chuka hai

ya ye ehsas gahra ho gaya hai

parinda KHun se tar aankhon mein uDta

safar apna sunahra ho gaya hai

main jin saDkon par aksar ghumta tha

wahan par aaj pahra ho gaya hai

wo mera hath thame kah raha hai

chalo ghar ab andhera ho gaya hai

bas ek aawaz ghar mein gunjti hai

zara so le sawera ho gaya hai

sunega kya sitaron ki sadaen

mera aakash bahra ho gaya hai

bichhaD kar KHud se main rota tha pahron

ye sadma bhi ikahra ho gaya hai

main us ke gham mein 'ajmal' Dubta kya

samundar aur gahra ho gaya he