chamkana hai chamkaiye imkan ghazal ke

chamkānā hai chamkā.iye imkān ġhazal ke

kyā chiiz haiñ tanqīd ke bīmār dhuñdalke

raushan koī pahlū nikal aa jaa.e ḳhabar kyā

dekho to zarā dard ke andāz badal ke

be-ḳhud hai pahuñch kar koī sahrā-e-alam meñ

mahkī huī gulshan kī fazāoñ se nikal ke

jo log samajhte haiñ tirī raah ko āsāñ

dekheñ vo zarā dhaar pe talvār ke chal ke

aate haiñ mirī samt bahāroñ ke safīne

be-nām tasavvur ke jazīroñ se nikal ke

dhote haiñ tire 'ahd-e-mohabbat kī siyāhī

aañsū shab-e-furqat mirī āñkhoñ se nikal ke

uf us kī nazar us kā jigar hausla us kā

rakkhā hai fasāne ko haqīqat se badal ke

ziine se bahāroñ ke guzarnā nahīñ āsāñ

ye marhala dushvār hai ai dost sañbhal ke

jo aaj rah-e-zīst meñ vīrāne haiñ 'vasfī'

mā'lūm hai tujh ko ye chaman-zār haiñ kal ke

chamkana hai chamkaiye imkan ghazal ke

kya chiz hain tanqid ke bimar dhundalke

raushan koi pahlu nikal aa jae KHabar kya

dekho to zara dard ke andaz badal ke

be-KHud hai pahunch kar koi sahra-e-alam mein

mahki hui gulshan ki fazaon se nikal ke

jo log samajhte hain teri rah ko aasan

dekhen wo zara dhaar pe talwar ke chal ke

aate hain meri samt bahaaron ke safine

be-nam tasawwur ke jaziron se nikal ke

dhote hain tere 'ahd-e-mohabbat ki siyahi

aansu shab-e-furqat meri aankhon se nikal ke

uf us ki nazar us ka jigar hausla us ka

rakkha hai fasane ko haqiqat se badal ke

zine se bahaaron ke guzarna nahin aasan

ye marhala dushwar hai ai dost sanbhal ke

jo aaj rah-e-zist mein virane hain 'wasfi'

ma'lum hai tujh ko ye chaman-zar hain kal ke