collage ka dalan nahin hai pyare zalim duniya hai

collage kā dālān nahīñ hai pyāre zālim duniyā hai

aur yahāñ sach bolne vaalā sach meñ sab se jhūTā hai

maiñ tere dīdār kī ḳhātir aa jaatā huuñ ḳhvāboñ tak

varna is lazzat ke alāva nīñdoñ meñ kyā rakkhā hai

chamkīle kapḌoñ se parkhā mat kar insānī lahje

gahre kuueñ meñ ujlā paanī kharā bhī ho saktā hai

va.ada kar ai dilkash laḌkī vasl se le kar hijr talak

rishta chāhe jaisā bhī ho ḳharcha apnā apnā hai

maiñ tere shikve bhī jānāñ bilkul aise suntā huuñ

jaise bachpan meñ koī bachcha ġhaur se qisse suntā hai

mere ḳhafā hone par us kā vo ulTā filmī jumla

pyaar se Dar nahīñ lagtā sāhab thappaḌ se Dar lagtā hai

jab logo ne saudā.ī kī laash utārī tab bole

ye to zinda mar hī chukā thā pañkhe se kyuuñ laTkā hai

maiñ is Dar se coffē piine tere saath nahīñ jaatā

tujh ko to coffē ke bahāne mujh se laḌnā hotā hai

mujh ko bone the dil meñ aur kisī ke ġham 'āfī'

lekin dil kī surḳhī zamīñ par ab tak us kā qabza hai

collage ka dalan nahin hai pyare zalim duniya hai

aur yahan sach bolne wala sach mein sab se jhuTa hai

main tere didar ki KHatir aa jata hun KHwabon tak

warna is lazzat ke alawa nindon mein kya rakkha hai

chamkile kapDon se parkha mat kar insani lahje

gahre kuen mein ujla pani khara bhi ho sakta hai

wada kar ai dilkash laDki wasl se le kar hijr talak

rishta chahe jaisa bhi ho KHarcha apna apna hai

main tere shikwe bhi jaanan bilkul aise sunta hun

jaise bachpan mein koi bachcha ghaur se qisse sunta hai

mere KHafa hone par us ka wo ulTa filmi jumla

pyar se Dar nahin lagta sahab thappaD se Dar lagta hai

jab logo ne saudai ki lash utari tab bole

ye to zinda mar hi chuka tha pankhe se kyun laTka hai

main is Dar se coffee pine tere sath nahin jata

tujh ko to coffee ke bahane mujh se laDna hota hai

mujh ko bone the dil mein aur kisi ke gham 'afi'

lekin dil ki surKHi zamin par ab tak us ka qabza hai