dard aaKHir dard hai aah-o-fughan hoga zarur

dard āḳhir dard hai āh-o-fuġhāñ hogā zarūr

aag lagtī hai jahāñ par bhī dhuāñ hogā zarūr

maiñ zamāne se zamāna mujh se barham hai magar

ek din apnā zamīn-o-āsmāñ hogā zarūr

laakh lahrātī raheñ ye bijliyāñ chāroñ taraf

andalībān-e-chaman kā āshiyāñ hogā zarūr

azm-e-mohkam shart hai raḳht-e-safar meñ rāh-rau

nazd-e-manzil ek din ye kārvāñ hogā zarūr

kaun thā jo fikr-e-ālam par achānak chhā gayā

ho na ho koī hamāre darmiyāñ hogā zarūr

qabl is ke har qadam aage baḌhe ye soch kar

sar jahāñ TuuTā hai dīvāna vahāñ hogā zarūr

jā.eza lete raho 'hamdam' kitāb-e-zīst kā

aane vaalā kal tumhārā imtihāñ hogā zarūr

dard aaKHir dard hai aah-o-fughan hoga zarur

aag lagti hai jahan par bhi dhuan hoga zarur

main zamane se zamana mujh se barham hai magar

ek din apna zamin-o-asman hoga zarur

lakh lahraati rahen ye bijliyan chaaron taraf

andaliban-e-chaman ka aashiyan hoga zarur

azm-e-mohkam shart hai raKHt-e-safar mein rah-rau

nazd-e-manzil ek din ye karwan hoga zarur

kaun tha jo fikr-e-alam par achanak chha gaya

ho na ho koi hamare darmiyan hoga zarur

qabl is ke har qadam aage baDhe ye soch kar

sar jahan TuTa hai diwana wahan hoga zarur

jaeza lete raho 'hamdam' kitab-e-zist ka

aane wala kal tumhaara imtihan hoga zarur