dekhi na marte marte bhi surat habib ki

dekhī na marte marte bhī sūrat habīb kī

qismat to dekhnā koī is be-nasīb kī

ai jaan jald aa nahīñ tāḳhīr kā ye vaqt

hālat bahut burī hai dil-e-nā-shakeb kī

ai sarv sab kī nazroñ se gir jā.egā abhī

tū hamsarī na kījiyo us jāma-zeb kī

aane lagā hai baaġh meñ sayyād sub.h-o-shām

ab būd-o-bāsh ho chukī yaañ andalīb kī

maktab meñ gar nashist rahī terī ai sanam

to sub.h-o-shām ḳhush lage sohbat adiib kī

tū laakh gāliyāñ mujhe de le abhī miyāñ

par baat mere sāmne mat kar raqīb kī

kyoñ dekhtā hai nabz ye bīmār-e-ishq kī

'afsos' aaj aql kidhar hai tabīb kī

dekhi na marte marte bhi surat habib ki

qismat to dekhna koi is be-nasib ki

ai jaan jald aa nahin taKHir ka ye waqt

haalat bahut buri hai dil-e-na-shakeb ki

ai sarw sab ki nazron se gir jaega abhi

tu hamsari na kijiyo us jama-zeb ki

aane laga hai bagh mein sayyaad subh-o-sham

ab bud-o-bash ho chuki yan andalib ki

maktab mein gar nashist rahi teri ai sanam

to subh-o-sham KHush lage sohbat adib ki

tu lakh galiyan mujhe de le abhi miyan

par baat mere samne mat kar raqib ki

kyon dekhta hai nabz ye bimar-e-ishq ki

'afsos' aaj aql kidhar hai tabib ki