dhoka bhi nahin tha koi unwan bhi nahin tha

dhokā bhī nahīñ thā koī unvāñ bhī nahīñ thā

aise meñ jiye jaane kā imkāñ bhī nahīñ thā

kyā jāniye kyā soch ke vaañ Duub ga.e ham

dariyā meñ to is dam kahīñ tūfāñ bhī nahīñ thā

ābād sarāboñ se sadā is kā jahāñ thā

sahrā mire dil sā kabhī vīrāñ bhī nahīñ thā

ik baat thī ye ham use socheñ ki na socheñ

haañ is ke sivā mas.ala-e-jāñ bhī nahīñ thā

ye jaan ke vo raqs kiyā ahl-e-junūñ ne

jo haath lagā un ke garebāñ bhī nahīñ thā

har saañs nikaltī hai tirī yaad meñ Duubī

aur bhuul ke jiinā tujhe āsāñ bhī nahīñ thā

kuchh phuul shagufta mire hoñToñ pe saje haiñ

ā.īna mujhe dekh ke hairāñ bhī nahīñ thā

phūloñ ke lahū se ye chaman-zār thā raushan

gulshan meñ kahīñ ḳhār-e-muġhīlāñ bhī nahīñ thā

hai baat baḌī jaan mirī kaam to aa.ī

vo qatl mujhe kar ke pashemāñ bhī nahīñ thā

in mast nigāhoñ ke ishāroñ ko samajhnā

mushkil bhī nahīñ thā koī āsāñ bhī nahīñ thā

duniyā ye bhalā kyuuñ mire qadmoñ meñ paḌī hai

maiñ is ke liye itnā pareshāñ bhī nahīñ thā

palkoñ ko sikhā dete rah-o-rasm bhī 'ḳhālid'

thī hijr kī shab aur charāġhāñ bhī nahīñ thā

dhoka bhi nahin tha koi unwan bhi nahin tha

aise mein jiye jaane ka imkan bhi nahin tha

kya jaaniye kya soch ke wan Dub gae hum

dariya mein to is dam kahin tufan bhi nahin tha

aabaad sarabon se sada is ka jahan tha

sahra mere dil sa kabhi viran bhi nahin tha

ek baat thi ye hum use sochen ki na sochen

han is ke siwa masala-e-jaan bhi nahin tha

ye jaan ke wo raqs kiya ahl-e-junun ne

jo hath laga un ke gareban bhi nahin tha

har sans nikalti hai teri yaad mein Dubi

aur bhul ke jina tujhe aasan bhi nahin tha

kuchh phul shagufta mere honTon pe saje hain

aaina mujhe dekh ke hairan bhi nahin tha

phulon ke lahu se ye chaman-zar tha raushan

gulshan mein kahin KHar-e-mughilan bhi nahin tha

hai baat baDi jaan meri kaam to aai

wo qatl mujhe kar ke pasheman bhi nahin tha

in mast nigahon ke ishaaron ko samajhna

mushkil bhi nahin tha koi aasan bhi nahin tha

duniya ye bhala kyun mere qadmon mein paDi hai

main is ke liye itna pareshan bhi nahin tha

palkon ko sikha dete rah-o-rasm bhi 'KHalid'

thi hijr ki shab aur charaghan bhi nahin tha