dhuli hui hain fazaen tere badan ki tarah

dhulī huī haiñ fazā.eñ tire badan kī tarah

khulī huī hai dhanak rang-e-pairahan kī tarah

ye kyā ġhazab hai ki is shahr meñ tire hote

bhaTak rahī hai nazar ek be-vatan kī tarah

huī vo sub.h vo chamkī pahāḌ kī choTī

vo āftāb nikaltā hai kohkan kī tarah

charāġh-e-dair-o-haram se to raushnī na huī

hamāre dil kī tarah terī anjuman kī tarah

ye kahkashāñ kī falak pe lakīr hai 'rif.at'

jabīn-e-nāz pe Thahrī huī shikan kī tarah

dhuli hui hain fazaen tere badan ki tarah

khuli hui hai dhanak rang-e-pairahan ki tarah

ye kya ghazab hai ki is shahr mein tere hote

bhaTak rahi hai nazar ek be-watan ki tarah

hui wo subh wo chamki pahaD ki choTi

wo aaftab nikalta hai kohkan ki tarah

charagh-e-dair-o-haram se to raushni na hui

hamare dil ki tarah teri anjuman ki tarah

ye kahkashan ki falak pe lakir hai 'rifat'

jabin-e-naz pe Thahri hui shikan ki tarah